மோடியின் கூட்டத்திற்கு கட்டணம்

மோடி கலந்துகொள்ளும் கூட்டத்திற்கு கட்டண வசூல் செய்வது மகாத்மா காந்தியை பின்பற்றுவதாகும்” என்று சுப்பிரமணியன் சாமி கருத்து தெரிவித்துள்ளார்.

 இதுகுறித்து அவர் கூறுகையில், “நரேந்திர மோடி கலந்து கொள்ளும் கூட்டத்தில் வசூலாகும்  கட்டணம் பா.ஜ.க வின் வளர்ச்சிப் பணிக்காக பயன்படுத்தப்படுகிறது.

மக்கள் கட்டணம் செலுத்தி மோடியின் கூட்டத்தில் பங்கேற்க தயாராக இருக்கிறார்கள். யாரையும் நாங்கள் கட்டாயப்படுத்தவில்லை. மகாத்மா காந்தியே இந்த முறையை தான் பின்பற்றினார். அவர் கையெழுத்திடுவதிற்கு ரூ.5 கட்டணம் விதித்தார்.” என்று அவர் தெரிவித்தார்.

பணவீக்கம் - அதிரடி முடிவு

ரிசர்வ் வங்கியின் புதிய ஆளுனராக பொறுப்பேற்றிருக்கும் ரகுராம் ராஜன் இன்று முதல் இந்திய மத்திய காலாண்டிற்கான பணக் கொள்கையை வெளியிட்டார்.

எதிர்பாராத வகையில் அதிரடியாக ரிப்போ விகிதத்தை 0.25 வீதம் அதிகரித்துள்ளார். இதன் மூலம் தற்போதைய ரிப்போ விகிதம் 7.5

ஆக அதிகரித்துள்ளது. அதாவது ரிசர்வ் வங்கியிடமிருந்து இதர வங்கிகள் பெறும் கடனுக்கான வட்டி இனி 7.5% வீதமாக செயற்படும். மத்திய ரிசர்வ் வங்கியின் புதிய ஆளுனராக பொறுப்பேற்ற ரகுராம் ராஜன் இன்று மும்பையில் முதல் நிதிக் கொள்கை மீதான மறு ஆய்வுக் கூட்டத்தில் கலந்து கொண்ட போது இந்த முடிவை அறிவித்தார்.

பணவீக்கத்தை கட்டுப்படுத்தி நிலைப்படுத்தவே இந்த முடிவை எடுத்துள்ளதாகவும் உடனடியாக இது அமலுக்கு வரவுள்ளதாகவும் மத்திய ரிசர்வ் வங்கி அறிவித்துள்ளது. நாட்டின் பணவீக்கம் கவலை அளிப்பதாக தெரிவித்துள்ள ரகுராம் ராஜன், பணவீக்கத்தில் தன்னிறைவு பெற தற்போதைக்கு வழியில்லை என தெரிவித்துள்ளார்.

இதேவேளை இந்த அறிவிப்பு வெளியானதை அடுத்து, பங்குச் சந்தையில், பி.எஸ்.சி சென்ச்கெஸ்க் 500 புள்ளிகளை இழந்துள்ளதுடன் நிஃப்டி 160 புள்ளிகளை இழந்துள்ளது

வேண்டாம் சிக்கன் 65...!

முகேஷுக்கு முப்பது வயதுகூட ஆகவில்லை. அவருக்கு கேன்சர் என்று மருத்துவர்கள் சொன்னதும், ஒட்டுமொத்த குடும்பமே அதிர்ச்சியில் உறைந்து போனது. காரணம் ராகவனிடம் மது, புகை என்று எந்த கெட்ட பழக்கமும் இல்லை. பிறகு எப்படி கேன்சர்? தலையைப் பிய்த்துக்கொண்ட மருத்துவர்கள் கடைசியாக அவரது உணவுப் பழக்கத்தை ஆராய்ந்தபோதுதான் உண்மை தெரியவந்தது.

அசைவப்பிரியரான ராகவன் தினமும் சாப்பாட்டில் சிக்கன் 65 இல்லாமல் சாப்பிடவே மாட்டாராம். அதுவும் செக்கச் சிவந்த நிலையில் மொறு மொறுவென்று இருக்கும் சிக்கன் 65ஐத்தான் விரும்பிச் சாப்பிடுவாராம். அதுதான் அவரது கேன்சருக்குக் காரணமாம். எப்படி? பளிச்சென்று தூக்கலாகத் தெரிவதற்காக சிக்கனுடன் சேர்க்கப்படும் அந்த சிவப்பு நிற கெமிக்கல் பவுடர்தான் அந்த கேன்சருக்கு முழுக்காரணம்.

இந்த கெமிக்கல் கலந்த சிக்கன் 65 சாப்பிடுவதால் வயிற்றில் கேன்சர், சிறுநீரகக் கோளாறு. மரபணுக்களில் பாதிப்பு போன்ற நோய்கள் உண்டாவதைக் கண்டறிந்திருக்கிறார்கள்.உணவுப் பொருட்களில் பயன்படுத்தக்கூடிய செயற்கை நிறங்கள் பற்றியும், பயன்படுத்தக்கூடாத நிறங்கள் பற்றியும் நெல்லை மாநகராட்சியின் உணவு ஆய்வாளர் சங்கரலிங்கம் பேசும்போது.

உணவு வகைகளில் பயன்படுத்தக்கூடிய செயற்கை நிறங்கள், பயன்படுத்தக்கூடாத செயற்கை நிறங்கள் என உண்டு. இந்தியாவில் 8 வகையான செயற்கை நிறங்களை மட்டுமே உணவுப் பொருட்களில் பயன்படுத்த அனுமதிக்கப்பட்டுள்ளது. இந்த நிறங்களும் குறிப்பிட்ட அளவு. அதாவது 10 கிலோ உணவுப் பொருளுக்கு 1 கிராம் மட்டுமே சேர்க்க அனுமதி. ஆனால் இதை யாரும் கடைப்பிடிப்பதில்லை. அனுமதிக்கப்பட்ட உணவு வகைகளில் அனுமதிக்கப்பட்ட அளவிற்கு மேல் செயற்கை நிறங்களைச் சேர்த்தால் உடலுக்குக் கேடுதான். எடுத்துக்காட்டாக, உணவில் சிவப்பு நிறம் கொடுக்க பயன்படுத்தப்படும் எரித்ரோசின் அளவு கூடினால் கழுத்துக் கழலை நோய் (goItre) வரும். இந்த செயற்கை நிறங்களும் இனிப்பு வகைகளில் மட்டுமே சேர்க்க அனுமதி. கார வகையான உணவுகளில் சேர்க்க அனுமதி கிடையாது.

பொன்சியூ4.ஆர்., எரித்ரோசின் பயன்படுத்தினால் சிவப்பு நிறம் கிடைக்கும். பிரில்லியண்ட் புளூ, இண்டிகோ கார்மைன் பயன்படுத்தினால் ஊதா கலர் கிடைக்கும். இந்த மாதிரியாக கிடைக்கக் கூடிய எட்டு வகையான கலர்களை ஐஸ்கிரீம் ஃப்ளேவர்டு மில்க், பிஸ்கட், இனிப்பு வகைகள், டின்களில் அடைத்து வரக்கூடிய பட்டாணி வகைகள், பாட்டில் பழ ஜூஸ் வகைகள், குளிர்பானங்கள் என ஏழு வகையான உணவுகளில் மட்டுமே சேர்க்க அனுமதி.

கார வகையான உணவுப் பொருட்களில் செயற்கை வண்ணங்களை கண்டிப்பாகச் சேர்க்கக்கூடாது. ஆனால் நமது மக்களின் மனதில் உணவைவிட உணவின் கலர்தான் பளிச்சென்று பதிந்து இருக்கிறது. சிக்கன் 65 என்றால் சிவப்பாக இருக்க வேண்டும். அப்படி இருந்தால் மட்டுமே அது சிக்கன் 65 என்ற முடிவில் மக்கள் இருக்கிறார்கள். மக்களின் மனதிற்கேற்ப வியாபாரிகளும் சிக்கன் 65 நிறத்தைக் கூட்டி, ஆபத்தை அறியாமலேயே வியாபாரம் செய்கின்றனர்.

சிக்கன் 65-ல் செயற்கை வண்ணங்களைச் சேர்ப்பதே தவறு. அதிலும் அனுமதிக்கப்படாத செயற்கை வண்ணங்களை அளவுக்கு அதிகமாக சேர்க்கின்றனர். எடுத்துக்காட்டாக சூடான் டை, மெட்டானில் எல்லோ கெமிக்கல்களைச் சேர்த்து துணிகளுக்கு சாயம் ஏற்றுவார்கள். இன்று இதனை சிக்கன் 65யுடன் சேர்த்து விடுகின்றனர். இப்படி சேர்ப்பதால் சிக்கன் 65 ரெட் கலரில் பளிச்சென்று தூக்கலாகத் தெரியும். இதைச் சாப்பிடுவதால் குடல்கேன்சர், சிறுநீரகக் கோளாறு, மரபணுக்களில் கோளாறு என கொடிய நோய்களை உண்டாக்கி விடுகிறது.

கிழக்கு ஐரோப்பிய நாடுகளிலும், அமெரிக்காவிலும் சூடான் டையை உணவில் பயன்படுத்தத் தடை விதித்துள்ளனர். செயற்கை நிறம் கொடுக்கக் கூடிய சூடான் டை கலந்த உணவை எலிகளுக்குக் கொடுத்து ஆராய்ச்சி செய்து பார்த்ததில் எலிகளின் சிறுநீரகங்களிலும் கல்லீரல்களிலும் கேன்சர் உருவாகியதாம்.இப்படி உணவுப் பொருளில் கலப்படம் செய்து வியாபாரம் செய்யும் வியாபாரிகள் உணவு தடைச்சட்டத்தின் பிடியிலிருந்தும் ஈஸியாகத் தப்பி விடுகின்றனர்.

உணவுக் கலப்பட வழக்குகளில் ஆஜராகும் வழக்கறிஞர் காந்திமதிநாதன் கூறும்போது: ஃபுட்கலர்ஸ் விற்பவர்கள் மீது சட்டப்படி எந்த நடவடிக்கையும் எடுக்க முடியாது. அந்த ஃபுட்கலர்ஸ் உணவுப் பொருட்களில் கலந்து உணவுப் பொருட்களுக்கு நிறத்தைக் கொடுத்த பின்புதான் அது குற்றமாகிறது. கலப்பட உணவுப் பொருட்களின் மீது வழக்குத் தொடரவேண்டுமானால் முதலில் தயாரித்து வைத்த உணவுப் பொருட்களை மூன்று பாகங்களாக சாம்பிள் எடுக்க வேண்டும். முதல் பாகத்தை உடனடியாக கெமிக்கல் லேபுக்கு அனுப்பி கலப்படத்தை உறுதி செய்து, ரிப்போர்ட் வாங்கி அந்த அடிப்படையில் வியாபாரியின் மீது வழக்குத் தொடரவேண்டும். மீதமுள்ள இரண்டு பாகமும் சுகாதார அதிகாரியின் கட்டுப்பாட்டில் வைத்து நீதிமன்றத்தில் வழக்கு விசாரணைக்கு வரும்போது சுகாதார அதிகாரி கட்டுப்பாட்டில் உள்ள உணவுப் பொருளின் இரண்டு பாகங்களை நீதிமன்றம் மூலம் மத்திய பகுப்பாய்வுக் கூடத்திடம் ரிசல்ட் கேட்கவேண்டும். அந்தச் சூழ்நிலையில் கண்டிப்பாக உணவுப் பொருள் கெட்டுப்போய்த்தான் இருக்கும். மத்திய பகுப்பாய்வுக் கூடத்தால் சரியான ரிசல்ட்டை கொடுக்க முடியாது. இதனால் வழக்கு நிற்காமல் அடிபட்டு விடும்.

எடுத்துக்காட்டாக சூடான்டையால் நிறம் ஊட்டப்பட்ட சிக்கன் 65ஐ சாம்பிள் எடுத்து கெட்டுப்போகாமல் இருக்க பார்மலின் என்ற கெமிக்கலை சிக்கன்-65 மீது ஊற்றி வைப்பார்கள். அந்த கெமிக்கல் சிக்கன் 65யின் முழுப்பகுதியையும் அடைய வாய்ப்புக் குறைவு. அப்படி கெமிக்கல் படாத இடம் முதலில் கெட்டுப்போய் மொத்த சிக்கன் 65ஐயும் கெட்டுப்போகச் செய்து விடுகிறது. அதனால் அதிலிருந்து சரியான ரிசல்ட் எடுக்க முடியாமல் போய் விடுகிறது.உணவுக் கலப்பட சட்டத்தைப் பொறுத்தமட்டில் வியாபாரிகளுக்கும், சில பங்களிப்பு இருப்பதால் வியாபாரிகள் எளிதில் தப்பிவிடுகின்றனர்” என்கிறார். அதனால் தேவையற்ற கெமிக்கல் கலர் பொடிகள் சேர்த்த சிக்கன்களைத் தவிர்ப்பது ஒன்றே இதற்குத் தீர்வு?

கேன்சர் ஆபத்து!

இது குறித்து சென்னையைச் சேர்ந்த பிரபல குடல்நோய் நிபுணர் டாக்டர் சதீஷிடம் கேட்டபோது: “சிக்கன் 65ல் சேர்க்கப்படும் நிறத்தால் உடனடி பாதிப்பாக நெஞ்சு எரிச்சல், அமிலத்தன்மை அதிகரிப்பால் இரைப்பை அழற்சி ஏற்படும். நீண்ட நாட்கள் அதைச் சாப்பிட்டு வந்தால் பெருங்குடலில் கேன்சர், சிறுநீரகப் பாதிப்பு உண்டாகும். தொடர்ந்து சிறுநீரகத்திலிருந்து ரசாயன நச்சுப் பொருட்கள் ரத்தத்தோடு கலந்து சிறுநீர்ப் பைக்கும் செல்லும். அங்கே ஏற்படும் மாற்றங்களால் சிறுநீர்ப் பையில் புற்றுநோய் வரும் ஆபத்து உண்டு. கழுத்தில் கழலை, மரபணுக்களில் மாற்றங்கள் ஏற்படுவதையும் தவிர்க்க முடியாது’ என்று எச்சரிக்கிறார்.

பெண்களுக்கு ஏற்படும் புற்றுநோய்க்கு தடுப்பூசி

இந்திய, பெண்களுக்கு மார்பகபுற்று நோய் தாக்குதல் இன்று அதிகரித்து வருகிறது. நகர் புறங்களில் வாழும் 1: 28 என்ற விகிதத்தில் பெண்களை இந்த நோய் தாக்குகிறது.

40 வயதுக்கு மேற்பட்ட பெண்களுக்கு இந்நோய் அதிகமாக வரும் வாய்ப்புள்ளது.மார்பக புற்றுநோய் பெண்களுக்கு ஈஸ்ட்ரோஜன் என்னும் ஹார்மோன் ரத்தத்தில் அதிகமாக சுரப்பதினால் அதிக உடல் பருமன், கொழுப்பு மிகுந்த உணவுப்பண்டங்களை உண்ணுதல்.

இளம் வயதில் பருவமடைதல், குறைந்த காலம் மட்டுமே தாய்ப்பால் கொடுப்பது போன்றவை இந்நோய் வருவதற்கான காரணங்களாக உள்ளன. மேலும், குடும்பத்தில் நெருங்கிய பெண் உறவினர்கள் ஆகியோருக்கு மார்பக புற்றுநோய் இருந்தால், அப்பெண்ணுக்கு மார்பக புற்றுநோய் வரும் வாய்ப்பு அதிகம்.மார்பக புற்றுநோய் வருவதை கண்டறிய மாமோகிராம் என்னும் "ஸ்கிரீனிங்' டெஸ்ட் உதவுகிறது. இதை 40 வயதுக்கு மேற்பட்ட பெண்கள் அனைவரும் ஆண்டுதோறும் மேற்கண்ட தகுந்த சிகிச்சை பெறலாம்.

இந்த மாமோகிராம் டெஸ்ட், எக்ஸ்ரே மற்றும் அல்ட்ரா சவுண்ட் கதிர்களை கொண்டு வலியின்றி செய்யப்படும்.மார்பக வலியற்ற கட்டிகள், காம்பிலிருந்து நீர் வடிதல், மார்பக நிறம் மாறுதல் போன்றவை தெரிந்தால் உடனே தக்க மருத்துவரை அணுகி பரிசோதனை மேற்கொள்வது மிகவும் அவசியம். இவை அனைத்தும் மார்பக புற்றுநோயின் அறிகுறிகளாகும்.மார்பக புற்றுநோய் குறித்த விழிப்புணர்வும் மாமோகிராம் போன்ற தற்காப்பு ஸ்கிரீனிங் டெஸ்டும் இந்நோயை ஆரம்ப நிலையில் கண்டறிய உதவும். அவ்வாறு ஆரம்ப நிலையில் உள்ள இந்நோயை, தகுந்த சிகிச்சை மூலம் முற்றிலுமாக நீக்கினால் நலமுடன் வாழ முடியும்.

செர்வைகல் கேன்சர்செர்வைகல் கேன்சர் என்பது கர்ப்பப்பையின் வாய் பகுதியில் வரும் புற்றுநோய் ஆகும். இந்தியாவில் செர்வைகல் கேன்சர் பெண்களுக்கு ஏற்படும் புற்றுநோய் தொடர்பான மரணத்துக்கு முதல் காரணமாகும். கடந்த ஆண்டு 72, ஆயிரத்துக்கும் மேற்பட்ட இந்திய பெண்கள் செர்வைகல் கேன்சரால் உயிரிழந்துள்ளனர். மேலும் ஒவ்வொரு ஆண்டும் 1 லட்சத்து 82 ஆயிரத்து 027 பெண்களை இந்த புற்றுநோய் தாக்குகிறது.

கர்ப்பப்பையின் வாய்ப்பகுதியில் இந்த எச்.பி.வி., வைரசின் தாக்கத்தினால் ஏற்படும் மாற்றியங்கள் எளிய ஸ்மியர் டெஸ்ட் மூலம் கண்டறியலாம். பேப் ஸமியர் டெஸ்ட் புற்று நோய் வருவதற்கு முன் ஏற்படும் ஆரம்ப குறிகளை கண்டறிய உதவும். மேலும், தகுந்த சிகிச்சை மூலம் நோய் முற்றிலும் பரவாமல் இருக்க வழிவகுக்கும்.

தற்போது, செர்வைகல் கேன்சர் வராமல் தடுக்க செர்வைகல் கேன்சர் தடுப்பூசி உள்ளது. இது உடலின் நோய் எதிர்ப்பு சக்தியை அதிகரிக்கிறது. கேன்சரை தடுக்கிறது. இந்த தடுப்பூசியை எல்லா வயது பெண்களும் போட்டுக் கொள்ளலாம். எனினும் இளம் பெண்கள் பருவமடைந்த உடனே போட்டுக் கொள்வது மிகவும் சிறந்ததாகும். இன்று, உலகில் செர்வைகல் கேன்சரால் இறக்கும் 4 ல் 1 பெண் இந்தியராக இருக்கிறார். இந்த கொடிய நோய் வருமுன் எளிய பேப்ஸ்மியர் டெஸ்ட் மற்றும் தடுப்பூசி மூலம் பெண்கள் நலனை காப்போம்.

குறிப்பிட்டு சொல்லப்போனால், புற்றுநோய் வகையிலேயே, இந்த ஒரு புற்றுநோயைத் தடுக்க மட்டுமே தற்போது தடுப்பூசிகள்  விற்பனையாகிறது என்பது குறிப்பிடத்தக்கது.

இந்த வாய்ப்புகள் இருந்தாலும், இந்தியாவில், கருப்பை வாய் புற்றுநோய் காரணமாக ஏராளமான பெண்கள் உயிரிழப்பது மிகவும் கவலை அளிக்கிறது.

சிறுவனின் சாதனை

இங்கிலாந்தை சேர்ந்த ஒரு சிறுவன் தான் வரைந்த ஓவியங்களை பல கோடி ரூபாய்க்கு விற்று தொடர்ந்து புதிய சாதனைகளை படைத்துவருகிறார்.

இங்கிலாந்தை சேர்ந்த 10 வயது சிறுவனான கேய்ரான் வில்லியம்சன், இயற்கை காட்சிகளை தத்ரூபமாக வரையும் திறன் கொண்டவர். மிக சிறு வயதிலேயே வரைய துவங்கிய இவர், அண்மையில் தனது ஓவியங்களை சுமார் 340000 பவுண்டுகளுக்கு (இந்திய ரூபாய் மதிப்பில் சுமார் 3,09,21,922 ரூ ) விற்றுள்ளார்.

மிகுந்த கலைநயத்தோடு தோற்றமளிக்கும் இந்த சிறுவனின் ஓவியங்கள் விற்பனைக்கு வைக்கப்பட்ட 20 நிமிடங்களில், வாடிக்கையாளர்கள் மின்னஞ்சல், தொலைபேசி மூலம் இந்த ஓவியங்களை வாங்கியுள்ளனர்.

கேய்ரான் வில்லியம்சனின் ஒரு ஓவியம் மட்டும் 30,000 பவுண்டுகளுக்கு விற்பனையானதும், கேய்ரான் ஓவியம் வரைந்து சம்பாதித்த பணம் 1.5 மில்லியன் என்பதும் குறிப்பிடத்தக்கது.

இச்சிறுவன் வரைந்த ஓவியங்கள் இடம்பெறும் காலேரியில் பணிபுரியும் இவரது பெற்றோரான கெய்த் மற்றும் மிச்சேல், அவர்களது மகனான 10 வயது கேய்ரான் வில்லியம்சன் மற்ற சிறுவர்களை போல ஒரு சிறுவன் தான் எனவும், அவருக்கு கால்பந்து விளையாட்டு மிகவும் பிடிக்குமெனவும் தெரிவித்துள்ளனர்.

சீனாவில் விமான நிலையம் திறப்பு

சீனாவின் கட்டுப்பாட்டில் திபெத் உள்ளது. தன்னாட்சி அங்கீகாரம் அளிக்கப்பட்டுள்ள திபெத்தில் உலகின் மிக உயரமான இடத்தில் சீனா புதிதாக விமான நிலையம் கட்டியுள்ளது.

திபெத்தில் 4,334 மீட்டர் உயரத்தில் இருக்கும் பாங்டா விமான நிலையமே உயரமான இடத்திலிருந்து செயல்படும் விமான நிலையம் என்ற பெருமையை இதுவரை பெற்றிருந்தது. தற்போது சுற்றுலாத்துறையை விஸ்தரிக்கும் வண்ணமும், நாட்டின் மேற்குப் பகுதியில் நடைபெறும் அரசியல் அமைதியின்மையைக் கண்காணிக்கவும் 4,411 மீட்டர் உயரத்தில் புதிய விமான நிலையம் ஒன்றினை சீனா அமைத்துள்ளது. டயோசெங் யாடிங் என்று பெயரிடப்பட்டுள்ள இந்த விமான நிலையம், உயரமான இடத்தில் அமைந்துள்ள முதல் சிவிலியன் விமான நிலையம் என்ற பெருமையைப் பெறுகின்றது.

இத்தகைய உயரத்தில் விமானத்தின் உந்துசக்தி குறைவாக இருக்கும் என்பதால் நீளமான ஓடுதளங்கள் அமைக்கப்பட்டுள்ளன. இங்குள்ள 4,200 மீட்டர் நீளமுள்ள ஓடுபாதை நியூயார்க்கின் ஜான் எப் கென்னடியில் உள்ளதைவிட 242 மீட்டர்தான் குறைவாக உள்ளது. பயணிகளுக்கும்கூட காற்றழுத்தக் குறைவினால் வரும் நோய்கள் ஏற்படக்கூடும் என்று எச்சரிக்கப்பட்டுள்ளது.

நேற்று முதல் இந்த புதிய விமான நிலையத்திலிருந்து பயண சேவைகள் தொடங்கப்பட்டுள்ளன. பொதுவாக இங்கிருந்து பேருந்து மூலம் சிச்சுவான் மாகாணத்தின் தலைநகரான செங்டுவிற்குச் செல்ல இரண்டு நாட்கள் பிடிக்கும். இந்த விமானப் பயணம் அதனை 65 நிமிடங்களாக குறைக்கின்றது. இந்த மாத இறுதிக்குள் மற்ற சேவைகள் தொடங்கும் என்று தெரிவிக்கப்பட்டுள்ளது.

திபெத்தின் நுழைவாயிலாக விளங்கும் இந்தப் பகுதியின் கீழ் வாழும் திபெத்திய மக்களின் மத்தியில் உள்ள எதிர்ப்பைக் குறைத்து, பொருளாதார வளர்ச்சியை நிலைப்படுத்தி ஒரு சுற்றுலாப் பகுதியாக இந்த இடத்தை மேம்படுத்த சீனா முயன்று வருகின்றது.

ஏற்கனவே இங்கு காங்கர், லாஷா, பாஸ்டா, ஸிகாஷ் மற்றும் நகாளி ஆகிய 5 இடங்களில் சீனா விமான நிலையம் கட்டியுள்ளது. தற்போது 6–வதாக சிசுவான் மாகாணத்தில் டயோ செங் யாடிங் என்ற இடத்தில் விமான நிலையம் கட்டியுள்ளது.

இந்திய எல்லையொட்டிய திபெத் பகுதியில் சீனா ரெயில், ரோடு மற்றும் விமான வசதி செய்து வருகிறது. இதன் மூலம் இந்திய எல்லை பகுதியை சீனா சுலபமாக வந்தடைய முடியும்.

சீனாவின் இந்த நடவடிக்கைகள் இந்தியாவுக்கு கவலையை ஏற்படுத்தியுள்ளது.

விஞ்ஞானி வீரபத்திர ராமநாதனுக்கு 2013ம் ஆண்டுக்கான ஐ.நா விருது

இந்தியாவை சேர்ந்த விஞ்ஞானிக்கு ஐக்கிய நாடுகள் சபையின் சுற்றுச்சூழலுக்கான உயரிய விருது அறிவிக்கப்பட்டுள்ளது.

கலிபோர்னியாவில் உள்ள கடல் சார்ஆய்வு மையத்தில் பணியாற்றும் சுற்றுச்சூழல் விஞ்ஞானி வீரபத்திர ராமநாதனுக்கு 2013ம் ஆண்டுக்கான

சுற்றுச் சூழல் விருது தட்ப வெப்பம் மாறுதல் தன்மை குறித்து மிக சிறப்பாக எடுத்து உரையாற்றியதற்காக வழங்கப்படுகிறது.