சிறுவனின் சாதனை

இங்கிலாந்தை சேர்ந்த ஒரு சிறுவன் தான் வரைந்த ஓவியங்களை பல கோடி ரூபாய்க்கு விற்று தொடர்ந்து புதிய சாதனைகளை படைத்துவருகிறார்.

இங்கிலாந்தை சேர்ந்த 10 வயது சிறுவனான கேய்ரான் வில்லியம்சன், இயற்கை காட்சிகளை தத்ரூபமாக வரையும் திறன் கொண்டவர். மிக சிறு வயதிலேயே வரைய துவங்கிய இவர், அண்மையில் தனது ஓவியங்களை சுமார் 340000 பவுண்டுகளுக்கு (இந்திய ரூபாய் மதிப்பில் சுமார் 3,09,21,922 ரூ ) விற்றுள்ளார்.

மிகுந்த கலைநயத்தோடு தோற்றமளிக்கும் இந்த சிறுவனின் ஓவியங்கள் விற்பனைக்கு வைக்கப்பட்ட 20 நிமிடங்களில், வாடிக்கையாளர்கள் மின்னஞ்சல், தொலைபேசி மூலம் இந்த ஓவியங்களை வாங்கியுள்ளனர்.

கேய்ரான் வில்லியம்சனின் ஒரு ஓவியம் மட்டும் 30,000 பவுண்டுகளுக்கு விற்பனையானதும், கேய்ரான் ஓவியம் வரைந்து சம்பாதித்த பணம் 1.5 மில்லியன் என்பதும் குறிப்பிடத்தக்கது.

இச்சிறுவன் வரைந்த ஓவியங்கள் இடம்பெறும் காலேரியில் பணிபுரியும் இவரது பெற்றோரான கெய்த் மற்றும் மிச்சேல், அவர்களது மகனான 10 வயது கேய்ரான் வில்லியம்சன் மற்ற சிறுவர்களை போல ஒரு சிறுவன் தான் எனவும், அவருக்கு கால்பந்து விளையாட்டு மிகவும் பிடிக்குமெனவும் தெரிவித்துள்ளனர்.

சீனாவில் விமான நிலையம் திறப்பு

சீனாவின் கட்டுப்பாட்டில் திபெத் உள்ளது. தன்னாட்சி அங்கீகாரம் அளிக்கப்பட்டுள்ள திபெத்தில் உலகின் மிக உயரமான இடத்தில் சீனா புதிதாக விமான நிலையம் கட்டியுள்ளது.

திபெத்தில் 4,334 மீட்டர் உயரத்தில் இருக்கும் பாங்டா விமான நிலையமே உயரமான இடத்திலிருந்து செயல்படும் விமான நிலையம் என்ற பெருமையை இதுவரை பெற்றிருந்தது. தற்போது சுற்றுலாத்துறையை விஸ்தரிக்கும் வண்ணமும், நாட்டின் மேற்குப் பகுதியில் நடைபெறும் அரசியல் அமைதியின்மையைக் கண்காணிக்கவும் 4,411 மீட்டர் உயரத்தில் புதிய விமான நிலையம் ஒன்றினை சீனா அமைத்துள்ளது. டயோசெங் யாடிங் என்று பெயரிடப்பட்டுள்ள இந்த விமான நிலையம், உயரமான இடத்தில் அமைந்துள்ள முதல் சிவிலியன் விமான நிலையம் என்ற பெருமையைப் பெறுகின்றது.

இத்தகைய உயரத்தில் விமானத்தின் உந்துசக்தி குறைவாக இருக்கும் என்பதால் நீளமான ஓடுதளங்கள் அமைக்கப்பட்டுள்ளன. இங்குள்ள 4,200 மீட்டர் நீளமுள்ள ஓடுபாதை நியூயார்க்கின் ஜான் எப் கென்னடியில் உள்ளதைவிட 242 மீட்டர்தான் குறைவாக உள்ளது. பயணிகளுக்கும்கூட காற்றழுத்தக் குறைவினால் வரும் நோய்கள் ஏற்படக்கூடும் என்று எச்சரிக்கப்பட்டுள்ளது.

நேற்று முதல் இந்த புதிய விமான நிலையத்திலிருந்து பயண சேவைகள் தொடங்கப்பட்டுள்ளன. பொதுவாக இங்கிருந்து பேருந்து மூலம் சிச்சுவான் மாகாணத்தின் தலைநகரான செங்டுவிற்குச் செல்ல இரண்டு நாட்கள் பிடிக்கும். இந்த விமானப் பயணம் அதனை 65 நிமிடங்களாக குறைக்கின்றது. இந்த மாத இறுதிக்குள் மற்ற சேவைகள் தொடங்கும் என்று தெரிவிக்கப்பட்டுள்ளது.

திபெத்தின் நுழைவாயிலாக விளங்கும் இந்தப் பகுதியின் கீழ் வாழும் திபெத்திய மக்களின் மத்தியில் உள்ள எதிர்ப்பைக் குறைத்து, பொருளாதார வளர்ச்சியை நிலைப்படுத்தி ஒரு சுற்றுலாப் பகுதியாக இந்த இடத்தை மேம்படுத்த சீனா முயன்று வருகின்றது.

ஏற்கனவே இங்கு காங்கர், லாஷா, பாஸ்டா, ஸிகாஷ் மற்றும் நகாளி ஆகிய 5 இடங்களில் சீனா விமான நிலையம் கட்டியுள்ளது. தற்போது 6–வதாக சிசுவான் மாகாணத்தில் டயோ செங் யாடிங் என்ற இடத்தில் விமான நிலையம் கட்டியுள்ளது.

இந்திய எல்லையொட்டிய திபெத் பகுதியில் சீனா ரெயில், ரோடு மற்றும் விமான வசதி செய்து வருகிறது. இதன் மூலம் இந்திய எல்லை பகுதியை சீனா சுலபமாக வந்தடைய முடியும்.

சீனாவின் இந்த நடவடிக்கைகள் இந்தியாவுக்கு கவலையை ஏற்படுத்தியுள்ளது.

மீண்டும் பில்கேட்ஸ் முதலிடம்

பணக்காரர்கள் பட்டியலில் மீண்டும் முதலிடத்தைப் பிடித்துள்ளார் மைக்ரோசாஃப்ட் நிறுவனர் பில் கேட்ஸ். போர்ப்ஸ் நிறுவனம் வெளியிட்டுள்ள 400 பெரும் பணக்காரர்கள் பட்டியலில் முதலிடத்தில் கேட்ஸ் உள்ளார்.

கேட்ஸ் 7,200 கோடி டாலர் தொகையுடன் முதலிடத்தில் உள்ளார். இவருக்கு அடுத்தபடியாக வாரன் பஃபெட் 5,800 கோடி டாலர் தொகையுடன் உள்ளார். ஆரக்கிள் தலைமைச் செயல் அதிகாரி லாரி எலிசன் மூன்றாமிடத்தில் 4,100 கோடி டாலர் தொகையுடன் உள்ளார். இந்தப் பட்டியலில் மூன்று அமெரிக்கவாழ் இந்தியர்களும் இடம்பெற்றுள்ளனர்.

தொழிலதிபர் சார்லஸ், டேவிட் கோச் ஆகியோர் நான்காவது மற்றும் ஐந்தாவது இடங்களில் உள்ளனர். வால்மார்ட் நிறுவனத்தைச் சேர்ந்த வால்டன் குழுவினர் அடுத்த நான்கு இடங்களில் உள்ளனர். நியூயார்க் நகர மேயர் புளூம்பெர்க் 3,100 கோடி டாலருடன் 10வது இடத்திலுள்ளார்.

இந்தப் பட்டியலில் இடம்பெற்றுள்ள பணக்காரர்களின் மொத்த சொத்து மதிப்பு 2 லட்சம் கோடி டாலருக்கும் அதிகம். கடந்த ஆண்டு இவர்களின் சொத்து மதிப்பு 1.7 லட்சம் கோடியாகும். பணக்காரர்களின் சாரசரி நிகர சொத்து மதிப்பு 500 கோடி டாலராகும். கடந்த ஆண்டு இது 80 கோடி டாலராக இருந்தது. பட்டியலில் இடம்பெற்றுள்ள பணக்காரர்களின் குறைந்தபட்ட சொத்துமதிப்பு 130 கோடி டாலாரகும். இந்தப்பட்டியலில் இடம்பெற்றுள்ள முக்கியமான பணக்காரர்களில் ஃபேஸ்புக் நிறுவனத்தின் தலைமைச் செயல் அதிகாரி மார்க் ஜுகர்பெர்கும் ஒருவர்.

புளோரிடாவில் வாழும் பாரத் தேசாய் குடும்பத்தின் சொத்துமதிப்பு 220 கோடி டாலராகும். இவர் பட்டியலில் 252-வது இடத்தில் உள்ளார். கலிபோர்னியாவில் சாஃப்ட்வேர் உற்பத்தியாளராக உள்ள ரமேஷ் டி வாத்வானி 210 கோடி டாலருடன் அடுத்த இடத்திலும், துணிகர முதலீட்டாளரான விநோத் கோஸ்லா 150 கோடி டாலருடன் 352-வது இடத்திலும் உள்ளனர். பட்டியலில் இடம்பெற்றுள்ளவர்களில் 314 பேரின் சொத்து மதிப்பு கடந்த ஆண்டை விட இந்த ஆண்டு அதிகரித்துள்ளது. 30 பேருக்கு மட்டும் சொத்து மதிப்பு சரிந்துள்ளது.

மிஸ் அமேரிக்கா - டுவிட்டர்

மிஸ் அமெரிக்காவாக வாகை சூடிய முதல் இந்திய வம்சாவளிப் பெண்ணான நீனா டவுலுரி மீது சமூக வலைத்தளங்களில் இனவெறித் தாக்குதல் நடத்தபட்டுள்ளது.

 குறிப்பாக டுவிட்டர் இணையத்தளத்தில் நீனா டவுலுரியை ஒரு அரேபிய பெண்ணாக சித்தரித்து அவரை அல் – கைதாவுடனும் தொடர்பு படுத்தி இனவெறிக் காமெண்டுக்கள் வெளியிட்டுள்ளனர் சிலர்.

எமி அட்கின்ஸ் பெயரில் வெளியிடப்பட்டுள்ள டுவிட் ஒன்றில், அமெரிக்காவிலிருந்து வெளியேறிவிடுங்கள். நீங்கள் தீவிரவாதியை போன்று இருக்கிறீர்கள் என  தெரிவிக்கப்பட்டுள்ளது.

இன்னொரு டுவிட்டில், செப்.11 அமெரிக்க இரட்டைக் கோபுர தாக்குதல் நினைவு தினம் அனுஷ்டிக்கப்பட்ட நான்கு நாட்களுக்குள் மிஸ் அமெரிக்காவாக இவர் தெரிவாகியுள்ளார் என கூறப்பட்டுள்ளது.

பிளேயன் எம்.கேல்ட்.ரெயின் எனும் பெயரில் வெளியிடப்பட்டுள்ள டுவிட்டில், அல் கைதாவுக்கு வாழ்த்துக்கள். எங்களது மிஸ் அமெரிக்கா, உங்களில் ஒருவர் என தெரிவிக்கப்பட்டுள்ளது.

எனினும் இந்த இனவெறிக்கருத்துக்களை நிராகரித்துள்ள நினா டலுவரி, நான் இவற்றுக்கு அப்பால் வந்துவிடத் துடிக்கிறேன். எப்போதும் நான் என்னை முதலில் அமெரிக்கராக, ஏன் எப்போதும் அமெரிக்கராகவே பார்க்கிறேன் என கருத்து வெளியிட்டுள்ளார்.

இதேவேளை நினாவுக்கு ஆதரவாகவும் சில பிரபலங்கள் சமூகவலைத்தளங்களில் கருத்து வெளியிட்டுள்ளனர். அமெரிக்கா என்பது சகிப்புத் தன்மை அல்லாத நாடல்ல. பன்முகத்தன்மை கொண்ட நாடு. நீனா வெற்றி பெற்றது மிகச்சிறந்த தெரிவு என்கிறார் எரிகா டெஸா.

25 ஆயிரம் கோடி ரூபாய்க்கு முதலீடு

உலக வங்கியின் கடன் பத்திரங்களில் 25 ஆயிரம் கோடி ரூபாய்க்கு முதலீடு செய்ய மத்திய அமைச்சரவை ஒப்புதல் அளித்தது. மத்திய அமைச்சரவை கூட்டம் பிரதமர் மன்மோகன் சிங் தலைமையில் நேற்று நடந்தது. இதில் பல்வேறு முக்கிய முடிவுகள் எடுக்கப்பட்டன.

இக்கூட்டம் முடிந்ததும் நிருபர்களிடம் பேசிய மத்திய தகவல் ஒளிபரப்புத் துறை அமைச்சர் மணீஷ் திவாரி கூறியதாவது:

உலக வங்கியிடமிருந்து 25 ஆயிரம் கோடி ரூபாய்க்கு கடன் பத்திரங்களை வாங்க மத்திய அமைச்சரவை ஒப்புதல் அளித்தது. நடப்பு நிதியாண்டில் வறுமைக்கோட்டிற்கு கீழ் உள்ள மக்களுக்கு வினியோகிப்பதற்காக 5 டன் உணவு தானியங்களை கூடுதலாக ஒதுக்கீடு செய்ய அனுமதி அளிக்கப்பட்டது. உணவு பாதுகாப்பு சட்டம் அமலுக்கு வந்ததையடுத்து, இந்த முடிவு எடுக்கப்பட்டது.

அரசு – தனியார் கூட்டுத் திட்டத்தின் கீழ் நான்கு பெரிய துறைமுகங்களில் சரக்கு கையாளும் முனையங்களை மேம்படுத்த உரிமம் வழங்குவதற்கு ஒப்புதல் அளிக்கப்பட்டது. பருத்தி மீது 10 சதவீத ஏற்றுமதி வரி விதிப்பது குறித்து கூட்டத்தில் முடிவு எடுக்கப்படவில்லை. அதே நேரத்தில், பட்டுத் தொழிலை மேம்படுத்தும் வகையில் 12வது ஐந்தாண்டு திட்டத்தில் 890 கோடி ரூபாய் மதிப்பிலான திட்டத்திற்கு, அமைச்சரவை ஒப்புதல் அளித்துள்ளது. இதன் மூலம், 2017ம் ஆண்டுக்குள் 90 லட்சம் பேர் நேரடி மற்றும் மறைமுகமாக வேலைவாய்ப்பு பெற முடியும். இவ்வாறு அவர் கூறினார்.

மத்திய அமைச்சரவையின் ஒப்புதலை அடுத்து உலக வங்கியின் கடன் பத்திரங்களில் 25 ஆயிரம் கோடி ரூபாய்க்கு, ரிசர்வ் வங்கி முதலீடு செய்யும். இதன் மூலம் உலக வங்கியிடமிருந்து கடன் பெறும் அளவு விரிவடையும் என நிதி அமைச்சக அதிகாரி ஒருவர் கூறினார்.

ரஷ்ய அதிபரின் எச்சரிக்கை

சிரியா மீது அமெரிக்கா ஒருதலைப்பட்சமாக தாக்குதல் நடத்தக் கூடாது என்று ரஷிய அதிபர் விளாதிமிர் புதின் எச்சரித்துள்ளார்.

இது தொடர்பாக அமெரிக்காவைச் சேர்ந்த ஏ.பி. செய்தி நிறுவனத்துக்கும் ரஷிய அரசின் சேனல்-1 தொலைக்காட்சிக்கும் அவர் அளித்த பேட்டியில் கூறியது: சிரியாவுக்கு எதிரி நாடுகளின் தாக்குதலில் இருந்து பாதுகாப்பு அளிக்கக் கூடிய எஸ்-300 ரக ஏவுகணைகளின் பாகங்களை ரஷியா வழங்கியுள்ளது.

ஐ.நா. பாதுகாப்பு கவுன்சிலின் அனுமதியின்றி சிரியா மீது தாக்குதல் நடத்த மேற்கத்திய நாடுகள் முடிவு செய்தால் சிரியாவுக்கு கூடுதலாக ஏவுகணை பாகங்கள் விற்பனை செய்யப்படும்.

சிரியாவில் கிளர்ச்சியாளர்களை எதிர்த்து ராணுவம் போரிட்டு வருகிறது. இந்தச் சூழ்நிலையில் ராணுவம் ரசாயன ஆயுதங்களைப் பயன்படுத்தியது என்று கூறுவது கேலிக்குரியது. அந்த ஆயுதங்களைப் பயன்படுத்தினால் அதையே சாக்காகக் கூறி தங்கள் நாட்டின் மீது தடைகள் விதிக்கப்படவும், தாக்குதல் நடத்தவும் முனையும் என்பது சிரியாவுக்குத் தெரியும்.

ஒருவேளை சிரியாவில் ரசாயன ஆயுதங்களை ராணுவம் பயன்படுத்தியது என்றால் அதற்கான ஆதாரங்களை ஐ.நா. பாதுகாப்பு கவுன்சிலில் சமர்ப்பிக்க வேண்டும். ஆனால், ரசாயன ஆயுதங்கள் பயன்படுத்தப்பட்ட தகவல் எங்களால் நம்பும்படி இருக்க வேண்டும். ஆனால், அது வதந்திகளின் அடிப்படையிலோ, ரகசிய உளவாளிகள் அளிக்கும் தகவல் அடிப்படையிலோ இருக்கக் கூடாது.

C04DWARஜி-20 நாடுகளின் உச்ச மாநாட்டில் கலந்து கொள்ள ரஷியா வரும் அமெரிக்க அதிபர் ஒபாமா என்னைத் தனியாகச் சந்திக்கவிருந்தார். அந்தச் சந்திப்பை அவர் ரத்து செய்தது வருத்தம் அளிக்கிறது. ரஷியாவுக்கு மகிழ்ச்சிப்படுத்த வேண்டும் என்பதற்காக அவரை அமெரிக்க மக்கள் தேர்ந்தெடுக்கவில்லை. அதேபோல் என்னை மற்றநாடுகளைத் திருப்திசெய்வதற்காக ரஷிய மக்கள் தேர்ந்தெடுக்கவில்லை என்றார் புதின்.

இதனிடையே, சிரியா மீது தாக்குதல் நடத்த அமெரிக்க அதிபர் ஒபாமாவுக்கு அதிகாரம் அளிக்கும் தீர்மானம் அந்நாட்டு நாடாளுமன்றத்தில் செவ்வாய்க்கிழமை தாக்கல் செய்யப்பட்டது. 60 நாள்கள் வரை தாக்குதல் நடத்த அனுமதிக்கும் வகையில் இத்தீர்மானம் வரையப்பட்டுள்ளதாக நாடாளுமன்ற வட்டாரங்கள் தெரிவித்தன. இத்தீர்மானம் மீதான வாக்கெடுப்பில் ஒபாமாவுக்கு வெற்றி கிடைக்கும் என்று எதிர்பார்க்கப்படுகிறது.

சிரியா மீது தாக்குதல் நடத்தும் ஒபாமாவின் திட்டத்துக்கு அந்நாட்டின் முன்னாள் வெளியுறவு அமைச்சர் ஹிலாரி கிளிண்டன் ஆதரவு தெரிவித்துள்ளார்.

எனினும், சிரியா மீது அமெரிக்கா தாக்குதல் நடத்துவதற்கு அமெரிக்க மக்களிடையே கடும் எதிர்ப்பு காணப்படுவதாக சமீபத்தில் எடுக்கப்பட்ட ஒரு கருத்துக்கணிப்பு மூலம் தெரிய வந்துள்ளது. வாஷிங்டனைச் சேர்ந்த பியூ ஆய்வு மையம் நடத்திய கணிப்பில் சுமார் 48 சதவீத அமெரிக்கர்கள், சிரியா மீது தாக்குதல் நடத்துவதற்கு எதிராகக் கருத்து தெரிவித்துள்ளனர். இந்த நடவடிக்கைக்கு வெறும் 29 சதவீதம் பேர் மட்டுமே ஆதரவு தெரிவித்துள்ளனர்.
இதேபோல், வாஷிங்டன் போஸ்ட் பத்திரிகையும் ஏபிசி செய்தி சேனலும் இணைந்து நடத்திய கருத்துக் கணிப்பிலும் சுமார் 48 சதவீதம் பேர் சிரியா மீது தாக்குதல் நடத்தக் கூடாது என்று தெரிவித்துள்ளனர்.

அமெரிக்க கடற்படை இணையதளம் சிரியா படையால் முடக்கம்

அமெரிக்க கடற்படை இணையதளம் சிரிய எலெக்ட்ரானிக் படையால் முடக்கம்

சிரியா மீது அமெரிக்கா போர் தொடுக்கப் போவதாக அறிவித்துள்ள சூழலில் அமெரிக்காவின் கடற்படையின் வர்த்தக வேலைவாய்ப்பு இணையதளம் சிரியாவின் எலெக்ட்ரானிக் படை என்ற ஒரு அமைப்பால் நேற்று பல மணி நேரம் முடக்கப்பட்டமை பரபரப்பை ஏற்படுத்தியுள்ளது.

சிரியாவில் ஜனாதிபதி பஷார் அல் ஆசாத்தின் ஆட்சிக்கு எதிராக கடந்த இரண்டு வருடங்களுக்கும் மேலாகப் புரட்சியாளர்கள் போரிட்டு வருகின்றனர். ...

போர் நிறுத்தத்திற்காக உலக நாடுகள் பலவும் குரல் கொடுத்து வருகின்றன. இலட்சக்கணக்கான மக்களைப் பலி வாங்கியுள்ள இந்த சண்டையில், கடந்த ஆகஸ்ட் மாதம் 21ம் திகதியன்று அரசு துருப்பு இரசாயன வெடிகுண்டுகளைப் பயன்படுத்தியதில் 426 குழந்தைகள் உட்பட 1429 பேர் பலியானதாக குற்றம் சாட்டப்பட்டுள்ளது.

இதற்கு தக்க பாடம் புகட்டும் விதமாக சிரியா மீது போர் தொடுக்க அமெரிக்க அரசு முடிவெடுத்தது. ஆயினும், இவர்களின் நட்பு நாடான இங்கிலாந்தில் நாடாளுமன்ற உறுப்பினர்கள் போருக்கு எதிராக வாக்களித்ததால் அமெரிக்கா தனியாக இதனை எதிர்கொள்ளும் நிலைமை தோன்றியுள்ளது.

அந்நாட்டிலும் பாராளுமன்ற உறுப்பினர்களின் சம்மதத்திற்காக அமெரிக்க அரசு காத்திருக்கின்றது. இதனிடையில் அமெரிக்க கடற்படையினரின் வர்த்தக வேலைவாய்ப்புத் தளம் ஒன்று சிரியாவின் எலெக்ட்ரானிக் படை என்ற ஒரு அமைப்பால் நேற்று பல மணி நேரம் முடக்கப்பட்டது.

அவர்களால் வெளியிடப்பட்ட ஏழு வாக்கியங்கள் கொண்ட செய்தி மட்டுமே அந்த இணையதளத்தில் தொடர்ந்து வெளியானது.

இந்த அமைப்பு ஆறு புகைப்படங்களையும் வெளியிட்டுள்ளது. அந்தப் படங்களில் உள்ள வாசகங்கள் சிரியாவில் இருக்கும் அல்கொய்தா தீவிரவாதிகளுக்காக நான் போராட மாட்டேன் என்று கையினால் எழுதப்பட்டிருந்தது.

இதன்மூலம் சிரியா அரசை எதிர்த்து அல்கொய்தா தீவிரவாதிகள் போரிட்டுக் கொண்டிருப்பதை அந்த அமைப்பு சுட்டிக் காட்டியுள்ளது.

அமெரிக்கா, சிரியா ஆகிய இரு நாடுகளுக்கும் பொதுவான எதிரி தீவிரவாதம்தான் என்றும், சிரியாவின் துருப்புகள் அமெரிக்காவுடன் நட்பு பாராட்டுபவை என்றும் அதில் தெரிவிக்கப்பட்டிருந்தது.

அமெரிக்காவின் நியூயார்க் டைம்ஸ், சமூக இணையதளமான டுவிட்டர் மற்றும் பல ஊடக தளங்களையும் முடக்கியதற்கு தாங்கள் பொறுப்பேற்பதாக எஸ்.ஈ.ஏ. தெரிவித்துள்ளதாக சீனப் பத்திரிகை தகவல் வெளியிட்டுள்ளது.

அமெரிக்க அரசின் இராணுவத் தலைமையகமான பென்டகனின் இணையதளப் பிரிவு இதனால் பாதிக்கப்படவில்லை என்று கடற்படைப் பிரிவின் செய்தித் தொடர்பாளர் எரிக் பிளானகன் தெரிவித்துள்ளார்.

வால்நட்சத்திரம் - ஐசோன்

இந்த நூற்றாண்டின், மிகப் பெரிய அதிசய மான, அற்புதமான, நிலவை ஒளியையே விழுங்கி ஏப்பம் விடும் தன்மையுள்ள ஒரு பெரிய ஒளி மிகுந்த வால்நட்சத்திரம் இந்த 2013,நவம்பர்-டிசம்பரில் வருகிறார், பராக், பராக் ..பராக்


பொதுவாக வானில் வலம் வரும் ஒரு வால்மீன்/வால்நட்சத்திரத்தின் வருகையை காலம் காலமாகவே ஒரு கெ ட்ட சகுனமாகவே கருதி வரும் சமூகம் இது. ஆனால் பாவம் இந்த இந்த வால் நட்சத்திரம் அப்படி எதுவும் எந்த கெட்ட செயலையும் செய்வதில்லை. ஆனால் கெட்ட பேர் மட்டும் வாங்கிவிட்டது.பொதுவாக வால்மீன் என்பது சூரியனுக்கு அருகில் சுற்றி வரும் ஒரு பணிக்கட்டியால் ஆனா ஒரு பொருள் அவ்வளவே. அது சூரியனை இஷ்டம் போலவே ஒரு சில ஆண்டுகளுக்கு ஒரு முறை வந்து சுற்றி விட்டுப் போகும். சில வால்மீன்கள் 20-200 ஆண்ட்குகளுக்கு ஒரு முறை கூட வருவது உண்டு. சில வால்மீன்கள் தன வாழ்நாளில் ஒரே ஒரு முறை மட்டும் வந்து சூரியனை சுற்றி விட்டு ஓடியே போய்விடும். மீண்டும் வரவே வராது.இப்படி ஓர் ஆண்டில் சூரியனை ஆலவட்டம் போடும் வால்மீன்கள் ஏராளம் ஏராளம்.

இந்த வால்மீன்களுக்கு ஒரு உட்கருவ்வும், ஒரூ வாலும் இருக்கும். கொஞ்சம் சேட்டைக்கார வால்மீன்களுக்கு /இரண்டு வால்களும் உண்டு. ஆனா இப்ப இன்னும் மூணு மாசத்துலே வரப்போற வால்மீன் ரொம்ப ரொம்ப பெரிசாம். வாலின் நீளம், ஒரு சில மீட்டரிலிருந்து, பல கிலோ மீட்டர் நீளம் வரை கூட இருப்பதுண்டு. அனைத்தும் பனிக்கட்டியால் ஆனவை; . ஆதிகாலத்தில் ஒவ்வொரு நாகரிகத்திலும், வால்மீன்கள் வந்து போன பதிவை குறிப்பிட்டு வைத்துள்ளார்கள. ஏ சு கிறிஸ்து பிறந்த போ து கூட ஒரு வால்மீன் தோன்றியதாக தகவல் பதிவு செய்யப்பட்டுஅது.

நவம்பர் மாதம் வரப்போகிற ஹீரோ வான்மீனை கடந்த ஆண்டு செப்டம்பர் 21ம் நாள்தான் ஓர் அமெச்சூர் வானவியலாளரான, வைட்டாலி நெவ்ஸ்கி மற்றும் அர்த்யோன் நோவிசொநோக் (Vitali Nevski and Artyom Novichonok ) கண்டுபிடித்தனர். அந்த வால்மீனைப் பார்க்க பயன்படுத்திய கருவியின் பெயரைக் கொண்டே அதற்கு
ஐசோன் ((ISON) )என்று பெயரிட்டுள்ளனர் the International Scientific Optical Network (ISON) என்பதன் கருகிய பெயர்தான் இஸ்கான். இதனை ரஷ்யாவிற்கு அருகில் கிஸ்லோவோட்ச்க் (near Kislovodsk, Russia.)என்ற இடத்தில் கண்டறிந்தனர்.

இந்த ஐசோன் வால்மீன் 2013, நவம்பர் 28 ம் நாள் , பூமிக்கு மிக அருகில் வருமாம். அதாவது சூரியனின் மையப்புள்ளியிலிரு ந்து சுமார் 1,800,000 km; தொலைவில் ( 0.012 AU வானியல் அலகில் ) வலம் வருமாம். ஊர்த் மேகத்திலிருந்து புறப்பட்டு வரும் புது வரவாம் இது. அக்டோபர் முதல் நாள் செவ்வாய்க்கு அருகிலும், டிசம்பர் 27 ல் பூமிக்கு அருகிலு ம் வரும். அதுவும் பூமி அதனுடைய சுற்றுவட்ட த்திற்கு மிக அருகில் 2014, ஜனவரி 12-14 நாட்களில் இருக்கும். 2014 ஜனவரியில் இதனை வெறும் கண்களால் பார்க்க முடியும்.

நவம்பர் நெருங்க நெருங்க ஐசோ ன் மிகப் பிரகாசமாய் தெரியும். எப்படி இருக்கும் தெரியுமா? முழு நிலவின் ஒளியையும், வெளிச்சத்தையும் கூட இந்த ஐசோனின் ஒளி விழுங்கி ஏப்பம் விட்டு விடுமாம். இந்த நூற்றாண்டில் வரும் மிகா பிரகாசமான வால்மீன் ஐசோன் ,மட்டுமே. மறந்துடாம எல்லாரும் இந்த வால்மீனைப் பாருங்கப்பா.. உங்க பிள்ளை குட்டிகளுக்கும் காட்டுங்கள். அது வர்ற ஒரு பத்து நாள் மின்னாடி பாக்கி விஷயம் பேசுவோம்.

நன்றி: பேரா.சோ.மோகனா

என்ரோல் 65 - ரகசியமாக விண்ணில் ஏவியது அமெரிக்கா

உலக நாடுகளின் நடமாட்டத்தை மோப்பம் பிடிக்கும் நவீன உளவு செயற்கைகோளை அமெரிக்கா வெற்றிகரமாக விண்ணில் செலுத்தியது.கலிபோர்னியாவில் உள்ள வண்டன்பர்க் விமானப்படை தளத்தில் இருந்து உலகின் மிகப்பெரிய ராக்கெட்டான ‘டெல்டா-4′ நவீன உளவு செயற்கைகோளை உள்ளூர் நேரப்படி, பிற்பகல் 2.30 மணிக்கு விண்ணில் ஏவியது.

‘என்ரோல் – 65′ என்னும் இந்த செயற்கைகோள் ஏவப்படும் செய்தி மிக ரகசியமாக பாதுகாக்கப்பட்டு வந்துள்ளது என்பது குறிப்பிடத்தக்கது.

இந்த செயற்கைகோள் வெற்றிகரமாக விண்ணில் செலுத்தப்பட்டதற்கு அடுத்தபடியான 7 நிமிடங்களுக்கு பின்னர், இதுதொடர்பான செய்திகள் அனைத்தும் இரட்டடிப்பு செய்யப்பட்டன.

இந்த மதிப்பு வாய்ந்த சொத்தினை விண்ணில் செலுத்தியதை அமெரிக்காவின் கெளரவமாக கருதுவதாக இந்த உளவு செயற்கைகோளின் திட்ட அதிகாரி ஜிம் ஸ்பானிக் தெரிவித்தார்.

செயற்கைகோள் ஏவப்படும் காட்சி தொலைக்காட்சியில் ஒளிபரப்பான போது பேசிய வர்ணனையாளர், ‘இந்த நாட்டின் விடுதலைக்காக தொண்டாற்றிய ஆண்களுக்கும், பெண்களுக்கும் இந்த செயற்கைகோள் ஏவலை அர்ப்பணிக்கிறோம்’ என்றார்.

இந்திய மீனவர்கள் பிரச்னை - மீன்வளத் துறை அமைச்சர் ரஜிதா செனரத்னே

இந்திய மீனவர்கள் பிரச்னையில் இலங்கை அரசு உறுதியான நிலைப்பாட்டைக் கொண்டுள்ளது என்று, அந்நாட்டு மீன்வளத் துறை அமைச்சர் ரஜிதா செனரத்னே வியாழக்கிழமை தெரிவித்தார்.

இந்திய, இலங்கை கடற்பகுதியை, பரஸ்பரம் இருநாட்டு மீனவர்களும் 70 நாள்களுக்கு பயன்படுத்திக் கொள்வதற்கான, மீனவர் அமைப்புகளின் செயல் திட்டத்தை இலங்கை அரசு நிராகரித்துள்ளதாகவும் அவர் கூறினார்.

இதுகுறித்து, கொழும்புவில் அவர் செய்தியாளர்களுக்கு வியாழக்கிழமை அளித்த பேட்டியில் கூறியதாவது: சர்வதேச கடல் எல்லைக்கோடு கருத்துருவை, அனைத்து நாடுகளும் ஏற்றுக்கொண்டுள்ளன. இதை எற்று, ஒப்பந்தத்தில் அந்த நாடுகள் கையெழுத்திட்டுள்ளன. எனவே, தமிழக அரசோ அல்லது அம்மாநில மீனவர்களோ சர்வதேச கடல் எல்லையை மீற முடியாது.

இந்திய கடற்பகுதியை இலங்கை மீனவர்களும், இலங்கை கடற்பகுதியை இந்திய மீனவர்களும் 70 நாள்களுக்குப் பயன்படுத்திக் கொள்ள அனுமதிக்க வேண்டும் என்று, இருநாட்டு மீனவர் சங்கங்களும் பரஸ்பரம் செயல்திட்டம் தயாரித்து அளித்தன.

அதை ஏற்க முடியாது. இந்த விஷயத்தில் நான் உறுதியாக இருக்கிறேன். மீனவர் சங்கங்களின் செயல் திட்டம் ஏற்கப்பட்டால், இலங்கையின் வடக்குப்பகுதி மீனவர்களுக்கு அநீதி இழைத்ததாகி விடும். சிங்கள மீன்வளத்துறை அமைச்சர் இலங்கைத் தமிழ் மீனவர்களிடம் பாரபட்சமாக நடந்துகொள்கிறார் என்ற குற்றம்சாட்டு என் மீது வரும்.

கடந்த 30 ஆண்டுகாலமாக அனுபவித்து வந்த துன்பங்களில் இருந்து, அண்மையில்தான் அவர்கள் விடுதலை அடைந்துள்ளனர். அவர்கள் அனைவரும் தமிழர்கள் ஆவர் என்றார் அவர்.

இந்திய எல்லைக்குள் மீண்டும் சீனப்படைகள் ஊடுருவல்

புதுடில்லி: காஷ்மீர் பகுதியை விட்டு, தற்போது அருணாச்சல் வழியாக இந்திய எல்லைக்குள் ஊடுருவி, சீனப்படைகள் அட்டூழியம் செய்துள்ளது. சீனாவுக்கு, நம் ராணுவ பலத்தை காட்டும் வகையில், லடாக் பகுதியில் அமைக்கப்பட்டுள்ள விமான தளத்தில், இந்திய விமானப் படைக்கு சொந்தமான, "சூப்பர் ஹெர்குலிஸ் விமானம்' நேற்று தரையிறக்கப்பட்டது. இந்நிலையில் அருணாச்சல்பிரதேசம் வழியாக சீனாப்படையினர் ஊடுருவி அட்டூழியம் செய்ய துவங்கியுள்ளனர்.
காஷ்மீரின் லடாக் பகுதியை ஒட்டியுள்ள, எல்லை கட்டுப்பாட்டு கோட்டு பகுதியில், கடந்த ஏப்ரல் மாதம் முதல் சீன ராணுவத்தினர், அடிக்கடி ஊடுருவுகின்றனர். இந்திய எல்லைக்குள் அத்துமீறி ஊடுருவும் சீன வீரர்கள், அங்கு முகாம்களையும் அமைத்து வருகின்றனர்.
தீர்வு காணப்படாத எல்லை பிரச்னை
இந்தியா-சீனா இடையே எல்லை பேச்சுவார்த்தையில் இன்னும் தீர்வு காணப்படவில்லை. நேற்று ஐந்து சுற்று பேச்சுவார்த்தை நடந்து முடிந்துள்ளது. அதே நேரத்தில் எல்லை கட்டுப்பாட்டு கோட்டை ஒட்டிய பகுதியில் அமைக்கப்பட்டுள்ள விமான தளத்துக்கு, நம் விமானப் படைக்கு சொந்தமான ஐ.ஏ.எப்.-சி 130 ஜெ. ரக சூப்பர் ஹெர்குலிஸ் விமானம் திட்டமிட்டபடி, அந்த விமான தளத்தில் தரையிறங்கியது. உலகிலேயே, மிக உயரமான இடத்தில் அமைக்கப்பட்டுள்ள இந்த விமான தளத்தில், இந்திய விமானப் படை விமானம் தரை இறக்கப்பட்டது முக்கியமான நிகழ்வாக கருதப்படுகிறது.
அருணாச்சலில் ஊடுருவல்
இதையடுத்து இந்தியாவை மிரட்ட ,சீனா எல்லையில் தனது அட்டூழியத்தை காட்டத் துவங்கியுள்ளது. இந்தியாவின் வடகிழக்கு மாநிலமான அருணாச்சல் பிரதேசத்தின், அஞ்சாவ் மாவட்டத்தின் சக்லாஹாம், எல்லைப்பகுதியில் கடந்த 13-ம் தேதி சீனாவின் பி.எல்.ஏ. எனப்படும் மக்கள் ராணுவப்படையினர் 30 கி.மீ. வரை ஊடுருவியுள்ளது தெரியவந்துள்ளது. இவர்கள் அப்பகுதியில் முகாம் அமைத்து, இந்தியாவிற்கு மிரட்டல் விடுத்துள்ளனர். இப்பகுதியில் இந்தோ-திபெத் எல்லை பாதுகாப்புப்படையினர் கண்காணித்து வருகின்றனர். இவர்களின் பாதுகாப்பை மீறி எல்லைக்குள் ஊடுருவியுள்ளது அதிர்ச்சியை ஏற்படுத்தியுள்ளது.
அமெரிக்கா உதவி தேவையில்லை
சீன ஊடுருவல் தொடர்பாக தேசிய பாதுகாப்பு ஆலோசகர் ஷிவசங்கர்மேனன், அமெரிக்காவில் கூறுகையில், சீன ஊடுருவல் விவகாரத்‌தினை அமெரிக்காவிடம் ‌கொண்டு சென்று முறையிட இந்தியா விரும்பவில்லை. இதில் அமெரிக்காவின் உதவியை இந்தியா எதி்ர்பாக்காது என பேசினார்.