ட்விட்டர் ஜோக்

கற்பழிப்புகள் நாடு முழுதும் பெருகி வரும் நிலையில் பெரிய அரசியல்வாதிகளெல்லாம் கற்பழிப்பு பற்றி எந்த கருத்தையும் கூறுவதிலிருந்து தங்களை விலக்கிக் கொண்ட சூழலில் ட்விட்டர் பதிவு ஒன்றில் வெளியான படு மோசமான ஜோக் பெரும் சர்ச்சைகளை கிளப்பியுள்ளது.

அந்த ஜோக்கின் தமிழாக்கம் இதோ: “பெண்கள் ஏன் கற்பழிப்பு குறித்து பயப்படவேண்டும்? உங்களை அனுபவிப்பதற்காகவே ஒருவன் வாழ்நாள் முழுதும் சிறையில் வாடும் ரிஸ்க்கை எடுக்கிறான் என்றால் அதனை நினைத்து கர்வம் அடையுங்கள்” என்பதுதான் இந்த வாசகம். இது ஜோக்கா என்பதே சந்தேகமாக உள்ளது. ஒரு மட்டித்தன்மான வாசகம் அவ்வளவே.

இந்த ட்விட்டருக்கு ஏகப்பட்ட எதிர்ப்புகள் குவிந்தன. எல்லோரும் அந்த நபரை பிடித்து வாங்கு வாங்கென்று வாங்கித் தள்ளியுள்ளார்கள்.

உண்மையில் இந்த ட்விட்டர், பேஸ்புக் போன்ற சோஷியல் மீடியாக்கள் என்ன செய்கின்றன?எழுதத் தெரியாதவர்களெல்லாம் ஏதோ உளற வேண்டியது அதற்கு இவ்வளவு லைக்குகள் என்று அசட்டுப் பெருமிதம் வேறு! எதையாவது உளறி ஏதோ ஒரு குறிப்பிட்ட குழுவிலாவது தனது பிராபல்யத்தை ஏற்படுத்திக் கொள்வது தவிர அங்கு என்னதான் பெரிதாக நடந்து விடுகிறது?

இந்திய நாட்டை உலுக்கும் பொருளாதார வறுமையை விட காமவறுமை பெரிதாகவே இருக்கிறது.

இந்த நிலையில் பெண்களை அவமானப்படுத்தும் இத்தகைய ஜோக்குகள் அல்லது வாசகங்கள் இன்னும் எவ்வளவு மோசமானவை என்பதை நாம் நினைத்துப் பார்க்கவேண்டும். கற்பழிப்பில் ஈடுபடும் காமாந்தகர்களை விட அவற்றை தள்ளி நின்று இதுபோன்று அசட்டுப்பிசட்டு கருத்து உதிர்ப்பவர்கள்தான் தண்டனைக்குரியவர்கள்!

விஞ்ஞானி வீரபத்திர ராமநாதனுக்கு 2013ம் ஆண்டுக்கான ஐ.நா விருது

இந்தியாவை சேர்ந்த விஞ்ஞானிக்கு ஐக்கிய நாடுகள் சபையின் சுற்றுச்சூழலுக்கான உயரிய விருது அறிவிக்கப்பட்டுள்ளது.

கலிபோர்னியாவில் உள்ள கடல் சார்ஆய்வு மையத்தில் பணியாற்றும் சுற்றுச்சூழல் விஞ்ஞானி வீரபத்திர ராமநாதனுக்கு 2013ம் ஆண்டுக்கான

சுற்றுச் சூழல் விருது தட்ப வெப்பம் மாறுதல் தன்மை குறித்து மிக சிறப்பாக எடுத்து உரையாற்றியதற்காக வழங்கப்படுகிறது.

'சூர்யா' இந்திய ஏவுகணை

10 ஆயிரம் கி.மீ. பாய்ந்து சென்று தாக்கவல்ல ஏவுகணையை இந்தியாவால் தயாரிக்க முடியும் என்று பாதுகாப்பு ஆராய்ச்சி மற்றும் மேம்பாட்டு அமைப்பின் (டி.ஆர்.டி.ஓ.) தலைவர் கூறினார்.

இந்தியா நேற்று முன்தினம் அக்னி–5 பாலிஸ்டிக் ஏவுகணையை வெற்றிகரமாக சோதித்து பார்த்தது. இது, கண்டம் விட்டு கண்டம் பாயும் ஏவுகணை ஆகும். இந்த ஏவுகணையின் சிறப்பம்சங்கள் மற்றும் எதிர்கால திட்டங்கள் குறித்து பாதுகாப்பு ஆராய்ச்சி மற்றும் மேம்பாட்டு அமைப்பின் தலைவர் அவினாஷ் சந்தர் நிருபர்களுக்கு பேட்டி அளித்தார்.

அப்போது அவர் கூறியதாவது, "அக்னி–5 ஏவுகணை, 5 ஆயிரம் கி.மீ. பாய்ந்து செல்லக்கூடியது. அது ஒட்டுமொத்த சீனாவையும் தாண்டி ஐரோப்பா வரை சென்று தாக்கக்கூடியது. அந்த ஏவுகணை இன்னும் 4 தடவை சோதித்து பார்க்கப்பட்ட பிறகு, இந்திய ராணுவத்தில் சேர்க்கப்படும். அதாவது, 2 ஆண்டுகள் கழித்து சேர்க்கப்படும். அதுபோல், இந்தியாவால் 10 ஆயிரம் கி.மீ. பாய்ந்து சென்று தாக்கவல்ல ஏவுகணைகளை கூட தயாரிக்க முடியும். முற்றிலும் உள்நாட்டிலேயே வடிவமைக்கப்பட்ட ஐ.என்.எஸ். அரிஹந்த் என்ற அணுசக்தி நீர்மூழ்கி கப்பல், இந்திய கடற்படையில் சேர்க்கப்படும். அதற்காக, இந்த ஆண்டு இறுதியிலோ அல்லது அடுத்த ஆண்டு தொடக்கத்திலோ அக்கப்பலை வைத்து ஆயுத பரிசோதனை நடத்தப்படும்." இவ்வாறு அவர் கூறினார்.

அக்னி-5 ஒரே ஒரு அணு அல்லது வேறு குண்டை ஏந்திச் செல்ல வல்லது. அடுத்தகட்டமாக ஒரே ஏவுகணையில் பல குண்டுகளை ஏந்திச் செல்லும் தொழில்நுட்பத்தை (Multiple independently targetable reentry vehicle-MIRVed) இந்தியா உருவாக்கி வருவதாகத் தெரிகிறது.

‘A6′ என்று கோட் நேம் இடப்பட்டுள்ள இந்த ஆராய்ச்சி தீவிரமாக நடந்து வருகிறது. இந்த ஏவுகணையின் தூரமும் 6,000 முதல் 10,000 கி.மீற்றராக இருக்கும் என்று கருதப்படுகிறது. இந்த ஏவுகணைக்கு ‘சூர்யா’ எனப் பெயரும் சூட்டப்பட்டுவிட்டது என்றும் தகவல்  வெளியாகியுள்ளது.

இந்த ஏவுகணையை நீர் மூழ்கிக் கப்பல்களில் இருந்தும் செலுத்தக்கூடியாதவும் (Submarine-launched ballistic missile) மேம்படுத்தும் திட்டத்திலும் டி.ஆர்.டி.ஓ உள்ளதாகத் தெரிகிறது.

இப்போது இந்தியாவிடம் தரையிலிருந்து தரையில் உள்ள இலக்கைத் தாக்கும் பிருத்வி குறைந்த தூர ஏவுகணை, தரையிலிருந்தும் கப்பல்களில் இருந்தும் கப்பல்களைத் தாக்கும் திரிசூல், தரையிலிருந்து விமானத்தையோ அல்லது விமானத்திலிருந்து விமானத்தையே தாக்கும் ஆகாஷ், இரவு-பகல் என எந்த நேரத்திலுந் கவச வாகனங்களைத் தாக்க உதவும் நாக் ஆகிய ஏவுகணைகளும், நீண்ட தூரம் சென்று தாக்கும் அக்னி வரிசையில் 1,2,3,4,5 ஆகிய ஏவுகணைகளும் உள்ளன என்பது குறிப்பிடத்தக்கது

தேர்தல் விதிமுறைகளில் சீர்திருத்தம்-சுப்ரீம் கோர்ட் தீர்ப்பு

தேர்தலில் போட்டியிடும் வேட்பாளர்கள் தங்களின் சொத்து விபரம், கல்வித்தகுதி மற்றும் கடந்த கால குற்ற பின்னணிகள் ஆகியவற்றின் முழுமையான, உண்மையான விபரத்தை சமர்ப்பிக்காவிட்டால் தேர்தலில் போட்டியிட முடியாது என சுப்ரீம் கோர்ட் நேற்று புதிய உத்தரவை பிறப்பித்துள்ளது. தேர்தல் விதிமுறைகளில் சீர்திருத்தம் கொண்டு வரும் விதமாக இந்த தீர்ப்பை சுப்ரீம் கோர்ட் அளித்துள்ளது.

தண்டனை பெற்ற எம்.பி., எம்.எல்.ஏ.,க்கள் பதவிநீக்கம் செய்யப்பட வேண்டும் என்ற சுப்ரீம் கோர்ட்டின் ஜூலை 10ம் தேதி வழங்கிய தீர்ப்பிற்கு பார்லி.,யில் கடும் எதிர்ப்பு தெரிவிக்கப்பட்டு, சுப்ரீம் கோர்ட் தீர்ப்பிற்கு எதிராக மசோதா தாக்கல் செய்யப்பட்டது.

இதனை அடுத்து சுப்ரீம் கோர்ட் தலைமை நீதிபதி சதாசிவம், நீதிபதிகள் ரஞ்சனா பி.தேசாய் மற்றும் ரஞ்சன் கோகோய் ஆகியோர் அடங்கிய பெஞ்ச், நேற்று புதிய உத்தரவை அளித்துள்ளது. அதில், வேட்பாளர்கள் தங்களின் வேட்பு மனுவில் சொத்து விபரம் உள்ளிட்ட பல காலங்களை பூர்த்தி செய்யாமல் காலியாக விடுவதாகவும், இனி வரும் காலங்களில் தேர்தல் அதிகாரிகள் அந்த விபரங்களை கேட்டு பெற வேண்டும் எனவும், அவர்கள் தர மறுத்தால் மனுவை நிராகரிக்குமாறும் தெரிவித்துள்ளனர்.

தவறான தகவல்களை தந்தாலும் அவர்களின் மனுவை நிராகரிக்க வேண்டும் எனவும் நீதிபதிகள் தெரிவித்துள்ளனர். இத்தகைய அத்யாவசிய விபரங்களை சரிபார்ப்பது வேட்புமனு சரிபார்க்கும் அதிகாரியின் கடமை எனவும் நீதிபதிகள் தெரிவித்துள்ளனர்.

அரசியல் கட்சிகள் பெறும் கட்சி நிதிகள் வரும் முறை மற்றும் அவற்றின் பின்னணி புரியாத புதிராகவே உள்ளது. அரசியல் கட்சிகள் பெறும் 75 சதவீதத்திற்கும் அதிகமான நிதியின் பின்புலம் மர்மமாக இருப்பதாக தகவல்கள் தெரிவிக்கின்றன.

ஜனநாயக சீர்திருத்த கழகம் அளித்துள்ள புள்ளிவிபர அடிப்படையில், 2004-05 மற்றும் 2011-12ம் ஆண்டுகளில் நாட்டின் முக்கிய 6 தேசிய கட்சிகள் பெற்ற மொத்த நிதி ரூ.4895.96 கோடி. இதில் 8.9சதவீதம் தொகை மட்டுமே யாரிடம் இருந்து பெறப்பட்டது என்ற விபரம் கொண்டதாக உள்ளது.

சுமார் ரூ.3674.50 கோடி யாரிடமிருந்து நிதியாக பெறப்பட்டது என தெரியவில்லை. காங்கிரஸ், பா.ஜ., தேசியவாத காங்கிரஸ், இந்திய கம்யூனிஸ்ட், மார்க்சிஸ்ட் கம்யூனிஸ்ட், பகுஜன் சமாஜ் கட்சி ஆகிய கட்சிகள் தேர்தல் ஆணையம் மற்றும் வருமான வரித்துறையிடம் அளித்த விபரங்களில் இருந்து தெரிய வந்துள்ளது.

இதில் காங்கிரஸ் கட்சி அதிகபட்சமாக 1951.07 கோடியை (82.5%) நிதியாக பெற்றுள்ளது. பா.ஜ., 73 சதவீதம் தொகையை நிதியாக பெற்றுள்ளது. இந்த தொகையில் பெரும்பாலானவை ரொக்க பணமாக பெற்றதாகும். இந்த கட்சி நிதிகள் குறித்த விபரங்கள் ஏன் தகவல் அறியும் உரிமை சட்டத்தின் கீழ் கொண்டு வரப்படுவதில்லை என அரசு சாரா நிறுவனங்கள் முதல் சராசரி குடிமகன் வரை கேள்வி எழுப்பி உள்ளனர். ஆனால் அரசியல் கட்சிகளை தகவல் அறியும் உரிமை சட்டத்தின் கீழ் கொண்டு வர அரசியல் கட்சிகள் எதிர்ப்பு தெரிவித்து வருகின்றன.

குற்றவாளிகள் 4 பேருக்கும் தூக்கு?

டெல்லி மாணவி கற்பழிப்பு, கொலை வழக்கில் குற்றவாளி என தீர்ப்பளிக்கப்பட்ட 4 பேருக்கும் தண்டனையை கோர்ட்டு இன்று (வெள்ளிக்கிழமை) அறிவிக்கிறது. அப்போது அவர்களுக்கு தூக்கு தண்டனை விதிக்கப்படுமா என்பது தெரிய வரும்.

டெல்லியில் கடந்த ஆண்டு டிசம்பர் 16–ந்தேதி இரவு துணை மருத்துவ மாணவி ஒருவர், ஓடும் பஸ்சில் 6 காமுகர்களை கொண்ட கும்பலால் கற்பழித்து, வீசி எறியப்பட்டு, உயிரிழந்த சம்பவம் நாட்டையே பதற வைத்ததுடன், வெட்கி தலைகுனியவும் வைத்தது.

இது தொடர்பான வழக்கில் குற்றவாளிகள் ராம்சிங், முகேஷ், பவன் குப்தா, வினய் சர்மா, அக்ஷய் தாக்குர் மற்றும் இளங்குற்றவாளி ஒருவர் என 6 பேர் கைது செய்யப்பட்டனர். ராம்சிங், டெல்லி திகார் சிறையில் தூக்கு போட்டு தற்கொலை செய்து கொண்டான். இளம் குற்றவாளிக்கு 3 ஆண்டு தண்டனை விதித்து டெல்லி சிறுவர் கோர்ட்டு கடந்த மாதம் தீர்ப்பு வழங்கியது.

முகேஷ், பவன் குப்தா, வினய் சர்மா, அக்ஷய் தாக்குர் ஆகிய 4 பேர் மீதான வழக்கை விசாரித்த டெல்லி விரைவு நீதிமன்றம், அவர்கள் மீதான குற்றச்சாட்டு சந்தேகத்துக்கு இடமின்றி நிரூபிக்கப்பட்டதாகக்கூறி, அவர்கள் குற்றவாளிகள் என கடந்த 10–ந்தேதி தீர்ப்பு வழங்கியது.

11–ந்தேதி தண்டனை குறித்த இரு தரப்பு வாதங்கள் நடைபெற்றன.

இந்த வழக்கில் குற்றவாளிகள் 4 பேருக்கும் தூக்கு தண்டனை விதிக்க வேண்டும் என்று போலீஸ் தரப்பில் வாதிடப்பட்டது. அவர்கள் செய்த மிகக்கொடிய குற்றத்துக்கு கருணை காட்ட வழியே இல்லை என்பது போலீஸ் தரப்பு வாதம்.

இருப்பினும் குற்றவாளிகள் தரப்பில் ஆஜரான வக்கீல், குற்றவாளிகள் மனம் திருந்தி வாழ ஒரு சந்தர்ப்பம் வழங்க வேண்டும் என்று நீதிபதியிடம் கேட்டுக்கொண்டார். தேசப்பிதா மகாத்மா காந்தி, ‘‘ இறைவன் தான் உயிரைக் கொடுக்க முடியும். அந்த இறைவனுக்குத்தான் உயிரை எடுக்கும் உரிமையும் உண்டு’’ என கூறி இருப்பதை சுட்டிக்காட்டினார்.

வாழ வேண்டிய வயதில் தனது உயிரை அநியாயமாகப் பறிகொடுத்த அந்த இளம் மாணவியின் குடும்பமும், குற்றவாளிகள் 4 பேருக்கும் தூக்கு தண்டனை விதிக்க வேண்டும் என கூறுகிறது.

இது குறித்து அவர்கள் கருத்து தெரிவிக்கையில், ‘‘குற்றவாளிகளை தூக்கில் போடப்பட்டால்தான் இந்த வழக்கில் நீதி கிடைக்கும். எங்கள் ஒரே மகளுக்கு கொடுமை இழைத்தபோது இது சரியா என அவர்கள் சிந்திக்கவில்லையே. அப்படி இருக்கிறபோது அவர்களுக்கு கோர்ட்டு ஏன் கருணை காட்டவேண்டும்?’’ என கேள்வி எழுப்புகின்றனர்.

போலீஸ், குற்றவாளிகள் தரப்பு வாதங்களை கேட்ட டெல்லி விரைவு நீதிமன்ற நீதிபதி யோகேஷ் கன்னா, இந்த வழக்கில் குற்றவாளிகள் 4 பேருக்கும் தண்டனை 13–ந்தேதி (இன்று) தெரிவிக்கப்படும் என அறிவித்தார். அதன்படி இன்று அவர் தனது தண்டனை தீர்ப்பை வெளியிடுவார். அதற்காக குற்றவாளிகள் 4 பேரும் பலத்த பாதுகாப்புடன் கோர்ட்டில் ஆஜர்படுத்தப்படுகின்றனர்.

இந்தியாவில் மட்டுமல்லாது வெளிநாடுகளிலும் பெரும் எதிர்பார்ப்பை ஏற்படுத்தியுள்ள இந்த வழக்கில், குற்றவாளிகள் 4 பேருக்கும் நீதிபதி மரண தண்டனை (தூக்கு தண்டனை) விதித்து தண்டனை தீர்ப்பு வழங்குவார் என்று எதிர்பார்க்கப்படுகிறது. அப்படி மரண தண்டனை விதிக்கப்பட்டால் இந்தியாவில் கற்பழிப்பு வழக்கில் மரண தண்டனை விதிக்கப்பட்ட முதல் குற்றவாளிகளாக இந்த 4 பேரும் இருப்பார்கள் என்பது குறிப்பிடத்தக்கது.

உத்திர பிரேதேச கலவரத்தின் பின்னணி

உ.பி.,யில் ஏற்பட்ட கலவரத்தை அடுத்து, ஏழு மாநிலங்களில், கலவரம் வெடிக்கும் அபாயம் ஏற்பட்டுள்ளதாக, மத்திய அரசு எச்சரித்துள்ளது. அதனால், போதிய முன் எச்சரிக்கை நடவடிக்கைகளை மேற்கொள்ளும்படி, அந்த மாநிலங்களை அறிவுறுத்தியுள்ளது.

உ.பி.,யின், முசாபர் நகர் மாவட்டத்தில், கடந்த மாத இறுதியில், ஜாட் இனத்தை சார்ந்த இளம் பெண் ஒருவரை, கேலி செய்ததாக கூறி, முஸ்லிம் சமூகத்தை சேர்ந்த மூன்று பேர் அடித்துக் கொல்லப்பட்டனர். இதனால், ஆத்திரம் அடைந்த ஒரு தரப்பினர், மற்றொரு தரப்பினரை தாக்கினர். இரு பிரிவினருக்கும் இடையே ஏற்பட்ட மோதல், பெரும் கலவரமாக மாறியது.

மற்ற மாவட்டங்களுக்கும், கலவரம் பரவியது. தீ வைப்பு, கத்தி குத்து, துப்பாக்கிச் சூடு என, முசாபர் நகர் மாவட்டம் முழுவதும், போர்க்களமாக மாறியது.இந்த கலவரத்துக்கு, நேற்று வரை, 31 பேர் பலியாகி விட்டனர். ராணுவம், மத்திய பாதுகாப்பு படையினர், போலீசார் உள்ளிட்டோர், கலவர பகுதிகளில் குவிக்கப்பட்டுள்ளனர். பதற்றம் நிறைந்த பகுதிகளில், ராணுவத்தினர், கொடி அணிவகுப்பு நடத்தினர். ஆனாலும், கலவரம் கட்டுக்குள் வரவில்லை.நேற்றும், பல இடங்களில் கலவரம் நீடித்தது. கலவரத்துக்கு பயந்து, கிராம மக்கள், வீடுகளை விட்டு வெளியேறி விட்டனர்.

கலவரம் நடந்த பகுதிகளில் பணியாற்றிய, உயர் போலீஸ் அதிகாரிகள், பணியிட மாற்றம் செய்யப்பட்டுள்ளனர்.கலவரத்தை தூண்டும் வகையிலான வீடியோ காட்சிகளை, இணையதளத்தில் வெளியிட்டதாக கூறி, பா.ஜ., எம்.எல்.ஏ.,க்கள், குகும் சிங், சுரேஷ் ராணா, பர்தேந்து, சங்கீத் சோம் ஆகியோர் கைது செய்யப்பட்டுள்ளனர்.காங்., முன்னாள் எம்.பி., ஹரேந்திராவும் கைது செய்யப்பட்டுள்ளார். இவர்களுடன் சேர்த்து, கலவரத்தில் ஈடுபட்ட 1,000 ஹிந்துத்துவா பயங்கரவாதிகளும் கைது செய்யப்பட்டுள்ளனர். கலவர பகுதிகளில், போலீசார், வீடு வீடாகச் சென்று, சோதனை நடத்தி வருகின்றனர். இதில், கத்திகள், துப்பாக்கிகள் உட்பட, ஏராளமான ஆயுதங்கள் கைப்பற்றப்பட்டுள்ளன.

மேலும், இந்த கலவரம், பீகார், ராஜஸ்தான், ம.பி., கர்நாடகா, அரியானா, காஷ்மீர் உட்பட, ஏழு மாநிலங்களுக்கு பரவும் அபாயம் உள்ளதாகவும், போதிய முன் எச்சரிக்கை நடவடிக்கைகளை மேற்கொள்ளும்படியும், சம்பந்தபட்ட மாநிலங்களுக்கு மத்திய அரசு எச்சரிக்கை விடுத்துள்ளது. மோடியை பிரதமராக கொண்டுவர இப்பொழுதே ஹிந்துவா இயக்கங்கள் திட்டமிட்டு கலவரங்களை நடத்த ஆரம்பித்து விட்டன. இதன் ஒருபகுதியாகவே ஒரு சாதாரண காதல் விவகாரத்தை வைத்து மூன்று பேரை அடித்தே கொன்றுள்ளது. அத்தோடு விடாமல் பாரதிய ஜனதா எம்.எல்.ஏ.,க்கள் மற்றும் ஆர்.எஸ்.எஸ். ஹிந்துத்துவா இயக்கங்கள் மூவரின் உயிரை குடித்த வெறி அடங்காமல் மேலும் கலவரத்தை தூண்டி பொது அமைதியை கெடுத்துள்ளனர்.

நமது நாட்டை ஆளும் கார்பரேட் நிறுவனங்கள்

இந்தியாவை ஆளுவது கார்பரேட் நிறுவனங்களே, அவர்கள் நினைத்தால் இந்தியா ஸ்தம்பித்து விடும் என்று எழுத்தாளரும், மனித உரிமை ஆர்வலருமான அருந்ததி ராய் தெரிவித்துள்ளார்.

"இந்தியாவில் உப்பு முதல் விமானம் வரை தயாரிக்கும் ஏகபோக உரிமை கார்பரேட் நிறுவனங்களுக்கு மட்டுமே வழங்கப்பட்டுள்ளது. இந்தியாவின் அனைத்துத் துறைகளிலும் கார்ப்பரேட் நிறுவனங்கள் முதலீடு செய்வதை தடுக்க வேண்டும்.

கார்பரேட் நிறுவனங்கள் நிறைந்த அமெரிக்காவில் கூட எல்லா துறைகளிலும் இவர்களுக்கு அனுமதியில்லை. இந்தியாவில் உள்ள 19க்கும் மேற்பட்ட பெரும் செய்தி ஊடகங்களை கார்ப்பரேட் நிறுவனங்கள்தாம் கட்டுப்படுத்துகின்றன. மக்கள் எந்த செய்தியை அறியவேண்டும் என்பதையும் அவர்கள்தாம் தீர்மானிக்கின்றார்கள்.

பணம் இருந்தால் எதுவும் செய்யலாம் என்ற சூழலும், கூட்டுப் படுகொலைக்கு தலைமை தாங்கிய நபர் மாநிலத்தை ஆளும் அபாயகரமான ஜனநாயகம் தான் இந்தியாவில் உள்ளது. கஷ்மீர் பிரச்சனைக்கு தீர்வு காண எந்த கட்சிக்கும் விருப்பம் இல்லை. இந்தியாவின் முழு ராணுவத்தையும் அனுப்பினாலும் கஷ்மீர் பிரச்சனை தீராது. இதர படையினரை நக்ஸல் வேட்டை என்ற பெயரில் காட்டுக்கு அனுப்பினாலும் பழங்குடியினரின் பிரச்சனைகள் தீராது.

40 சதவீத மக்கள் ஊட்டச்சத்துக் குறைவால் அவதியுறும் ஒரு நாட்டை எவ்வாறு சூப்பர் பவர் (வல்லரசு) என்று அழைக்கமுடியும் என்று எனக்கு தெரியவில்லை. மக்கள் தொகையில் 60 சதவீதம் பேர் ஏழ்மையில் உள்ளனர். அவர்கள் மீது விலைவாசி உயர்வு உள்ளிட்ட போர்ப் பிரகடனம் செய்கிறது அரசு. இவற்றையெல்லாம் பரிசீலிக்காமல் அணுசக்தி நிலையங்களை நிறுவ அரசு முயலுகிறது. அன்றாடம் உருவாகும் கழிவுகளை பாதுகாக்க கட்டமைப்பு இல்லாத தேசத்தில் அணுசக்தி கழிவுகளை என்னச் செய்யப் போகின்றார்கள்?"

* அன்றாடம் உருவாகும் சாதாரண கழிவுகளையே பாதுகாக்க நாட்டில் கட்டமைப்பு இல்லை என்ற அருந்ததிராயின் கேள்வி உண்மையானது.
நம்மிடம் ஓட்டை வாங்கிக்கொண்டு ஓட்டம் பிடித்தவர்கள் யாரேனும் இவரது கேள்விக்கு பதில் சொல்ல முன் வருவார்களா?

பெட்ரோல் பங்குகள் இரவில் மூடப்படுமா?

டாலருக்கு எதிரான ரூபாய் மதிப்பு வரலாறு காணாத அளவுக்கு வீழ்ச்சி அடைந்து வருவதை தடுக்க பல்வேறு நடவடிக்கைகளை மத்திய அரசு மேற்கொண்டு வருகிறது.அதிக அளவில் கச்சா எண்ணெய் வெளிநாடுகளில் இருந்து இறக்குமதி செய்வதே, இந்த வீழ்ச்சிக்கு முக்கிய காரணமாகும். எனவே, பெட்ரோல், டீசல் போன்ற பெட்ரோலிய பொருட்களை சிக்கனமாக பயன்படுத்தும் வகையில் புதிய கட்டுப்பாடுகளை விதிப்பது குறித்து மத்திய அரசு பரிசீலனை செய்து வருகிறது.

அதன்படி பெட்ரோலை சிக்கனமாக பயன்படுத்துவதற்காக இரவு 8 மணி முதல் காலை 8 மணி வரை பெட்ரோல் விற்பனை நிலையங்களை மூடுவது உள்ளிட்ட பல்வேறு யோசனைகள் மத்திய அரசுக்கு தெரிவிக்கப்பட்டு இருப்பதாக, பெட்ரோலியத் துறை மந்திரி வீரப்பமொய்லி நேற்று கூறி இருந்தார்.

இந்த திட்டத்திற்கு பா.ஜனதா உள்ளிட்ட எதிர்க்கட்சிகள் கடும் எதிர்ப்பு தெரிவித்து வருகின்றன. அதைத் தொடர்ந்து பிரதமர் மன்மோகன்சிங், இரவில் பெட்ரோல் விற்பனைக்கு தடை விதிக்கும் திட்டத்தை நிராகரித்துவிட்டார். மத்திய நிதி மந்திரி ப.சிதம்பரமும் வீரப்ப மொய்லியின் இந்த யோசனையை ஏற்கவில்லை.

நாட்டின் பொருளாதாரம் குறித்த விவாதம்

பாராளுமன்றத்தில் இன்று நாட்டின் பொருளாதாரம் குறித்தான எதிர்கட்சிகளின் கோரிக்கை எடுத்துக்கொள்ளப்பட்டு விவாதம் நடைபெற்று வருகிறது. மாநிலங்களவை எதிர்க்கட்சி தலைவர் அருண் ஜெட்லி நாட்டின் பொருளாதாரம் குறித்து கேள்வி எழுப்பி பேசினார். அவர் மேலும் கூறுகையில் நாட்டின் பொருளாதாரத்தை மத்திய அரசு சீர்குலைத்துவிட்டது என்று குற்றம் சாட்டினார். இந்நிலையில் இதற்கு பதில் அளித்த பிரதமர் மன்மோகன் சிங் பொருளாதார நிலை குறித்து விளக்கம் அளிக்க அவகாசம் வேண்டும் என்று கூறினார்.

உள்நாட்டு காரணிகளால் பொருளாதாரத்தில் பாதிப்பு ஏற்பட்டுள்ளது என்பதை நாம் மறுக்க கூடாது. அமெரிக்க ஊக்க பிரச்சினை போன்ற சர்வதேச காரணிகள் பொருளாதாரத்தில் பாதிப்பை ஏற்படுத்தியுள்ளது. மிகவும் சிக்கலான பொருளாதார பிரச்சனையை நாடு எதிர்க்கொண்டுள்ளது. நாளை பொருளாதார பிரச்சனை குறித்து மாநிலங்களவையில் அறிக்கை அளிக்கப்படும் என்று பிரதமர் மன்மோகன் சிங் கூறினார். இதற்கிடையே ஐக்கிய ஜனதா தளம் கட்சியின் தலைவர் சரத்யாதவ் ரூபாயின் மதிப்பு தொடர்ந்து சரிந்து வருவதால் மாநிலங்கள் பல்வேறு பிரச்சனைகளை எதிர்கொண்டுள்ளது என்றும் கூறினார்.

இதற்கிடையே ரூபாயின் மதிப்பு சரிவு குறித்து பிரதமர் மன்மோகன் சிங் விளக்கம் அளிக்க வேண்டும் என்று எதிர்க்கட்சி எம்.பி.க்கள் மக்களவையில் கடும் அமளியில் ஈடுபட்டனர். இதனை அடுத்து அவையை நண்பகல் 12 மணி வரை சபாநாயகர் மீராகுமார் ஒத்திவைத்தார்.

தாய் அல்ல இவள் - பேய்

மும்பையில் உள்ள கல்வா பகுதியில் தனது தாயுடன் வசித்து வந்த 16 வயது சிறுமிக்கு அவரது தாயே எச்ஐவி தொற்று தாக்கிய ஒரு நபருடன் வலுக்கட்டாயமாக திருமணம் செய்துவைத்து, சிறுமி அந்த நபரோடு உடலுறவு வைத்துக்கொள்ள மறுத்தப்போது சிறுமிக்கு மயக்க மருந்து கொடுத்து அந்த நபருக்கு உதவி புரிந்த கொடூரம் நடந்துள்ளது.

சிறுமியின் தாய்க்கு தூரத்து சொந்தமான அந்த நபர் சிறுமியின் குடும்பத்திற்கு அவ்வபோது பண உதவி செய்துவந்துள்ளார். இதனை வைத்து சிறுமியை தனக்கு திருமணம் செய்துக்கொடுக்கும் படி அந்த நபர் கூறியதற்கு சிறுமியின் தாயாரால் மறுப்பு தெரிவிக்க முடியவில்லை.

30 வயது நிரம்பிய அந்த நபரை மணந்துக்கொள்ள அச்சிறுமி எவ்வளவோ மறுப்பு தெரிவித்தபோதும், அவரது தாய் கேட்கவில்லை. கடந்த மே மாதம் எச்ஐவி தொற்றால் பாதிக்கபட்டவர் எனத் தெரிந்த பிறகும் சிறுமிக்கும் அந்த நபருக்கும் திருமணம் முடிந்துள்ளது.

திருமணம் முடிந்தபின் தன்னுடன் உறவு வைத்துக்கொள்ள அந்த நபர் முயலும் போதெல்லாம் சிறுமி அதற்கு மறுப்பு தெரிவித்து உள்ளார். இதனையடுத்து அச்சிறுமியை அடித்து, துன்புறுத்தி சில வேளைகளில் மயக்க மருந்து கொடுத்துக்கூட சிறுமியின் தாய் அந்த நபரின் சொல்படி நடக்குமாறு சிறுமியை வற்புறுத்தியுள்ளார்.

தாய் மற்றும் கணவரின் கொடுமையிருந்து தப்பிக்க இச்சிறுமி பல முறை முயன்றப்போதும், தற்கொலை செய்துகொள்வேனென தாய் மிரட்டியபின் அதனை கைவிட்டுள்ளார்.

ஒரு கட்டத்தில் இவர்கள் இருவரின் கொடுமை தாங்கமுடியாத அச்சிறுமி, அவரின் முன்னாள் ஆசிரியர் ஒருவரின் உதவியோடு குழந்தைகள் நல மையத்தில் புகார் அளித்துள்ளார். இதனை தொடர்ந்து சிறுமியின் தாய் மற்றும் கணவர் மீது வழக்கு பதிவு செய்துள்ள போலீசார் தலைமறைவாகியிருக்கும் இருவரையும் தேடி வருகின்றனர்.

மருத்துவ சிகிச்சைக்கு உட்படுத்தபட்டுள்ள அச்சிறுமி பாலியல் பலாத்காரம் செய்யப்பட்டுள்ளார் என்பது உறுதிசெய்யப்பட்டுள்ளது.

மும்பை - கற்பழிக்கப்பட்ட பெண் வாக்குமூலம்

மும்பையில் கடந்த 22-ம் தேதி இரவு புகைப்பட பெண் பத்திரிகையாளரை 5 பேர் கொண்ட கும்பல் கற்பழித்தது.
நாடு முழுவதும் கொந்தளிப்பை ஏற்படுத்தியுள்ள இச்சம்பவம் தொடர்பாக போலீஸார் தீவிர விசாரணை நடத்தி வருகின்றனர்.

முதல் குற்றவாளி சந்த் ஷாயிக்கை பொலிஸார் கைது செய்தனர். அதன்பின்னர் விஜய் ஜாதவ் என்ற குற்றவாளி நேற்று காலையில் பிடிபட்டான். அவர்கள் இருவரும் நேற்று நீதிமன்றில் ஆஜர்படுத்தப்பட்டு சிறையில் அடைக்கப்பட்டனர்.
இந்நிலையில், போலீஸாரால் தேடப்படும் நபர்களில் 3-வது நபரான சிராஜ் ரஹ்மான் நேற்று மாலை கைது செய்யப்பட்டான். அவனிடம் விசாரணை நடைபெற்று வருகிறது.

இதற்கிடையே, பாதிக்கப்பட்ட பெண் பத்திரிகையாளரின் உடல்நிலை தேறி வருகிறது.

போலீஸாரிடம் அந்த பெண் வாக்குமூலம் அளித்துள்ளார்.
அந்த வாக்குமூலத்தில் பாதிக்கப்பட்ட பெண் கூறியுள்ளதாவது,

மும்பை மகாலக்ஷ்மி ரெயில் நிலையம் அருகே உள்ள சக்தி மில்லிற்கு நானும் எனது சகப்பணியாளரும் சம்பவத்தன்று மாலை 5.30 மணியளவில் புகைப்படம் எடுப்பதற்காக சென்றோம். 

அப்போது மில்லின் உள்ளே இருந்து வந்த 2 பேர் இந்தப் பாதை வழியாக போக வேண்டாம். வேறு நல்ல பாதை வழியாக அழைத்துச் செல்கிறோம் என்று கூறி அழைத்துச் சென்றனர். 

நாங்கள் புகைப்படம் எடுக்கும் வேலையில் மும்முரமாக இருந்தபோது உள்ளே வந்த 3-வது நபர் தன்னை ரெயில்வே ஊழியர் என்று அறிமுகப்படுத்திக் கொண்டார். 

"எங்கள் முதலாளிக்கு தெரியாமல் நீங்கள் இந்த மில்லை புகைப்படம் எடுப்பதை அவர் அறிந்து கொண்டார். உங்களை அழைத்து வரச் சொன்னார்" என்று அந்த நபர் எங்களை மிரட்டினார். 

உங்கள் முதலாளியிடம் போனில் பேசுகிறேன் என்று நான் கூறினேன். அதற்கு மறுத்த அந்நபர் தன்னுடன் வரும்படி எங்களை மீண்டும் மிரட்டினார். உடனடியாக எங்கள் பத்திரிகையின் தலைமை புகைப்பட கலைஞரை நான் செல்போனில் தொடர்பு கொண்டேன். 

அவரது லைன் ‘பிஸி’யாக இருந்தது. சற்று நேரத்தில் எனது செல்போனை மீண்டும் அவர் தொடர்பு கொண்டார். ரெயில்வே ஊழியர் என்று கூறி எங்களை ஒருவர் மிரட்டுவதாக நான் தெரிவித்தேன். உடனடியாக அந்த இடத்தை விட்டு வந்துவிடும்படி அவர் கூறினார். 

நாங்கள் இருவரும் வெளிவாசல் வழியாக வர முயன்ற போது குற்றவாளிகளில் ஒருவன் எங்களை வழிமறித்து தடுத்தான். 

சில நாட்களுக்கு முன்னர் அந்த இடத்தில் ஒரு கொலை நடந்ததாகவும் என்னுடன் வந்த சகப்பணியாளர்தான் அந்த கொலையை செய்ததாக கூறி அவன் எங்களை மிரட்டினான். அவர்கள் அனைவரும் ஒன்றாக சேர்ந்து எங்களை மில்லின் உள்பக்கத்திற்கு இழுத்துச் சென்றனர். 

எங்களை விட்டுவிடும் படி நாங்கள் கெஞ்சினோம். எங்களிடம் இருந்த கேமராவையும் 2 செல்போன்களையும் ( ஒவ்வொன்றும் சுமார் ரூ. 30 ஆயிரம் மதிப்புள்ளது) தந்து விடுவதாகவும் நாங்கள் கூறினோம். நாங்கள் கூறிய எதையும் காதில் வாங்காத அந்த கும்பல், எங்கள் இருவரின் இடுப்பில் இருந்த பெல்ட்டுகளை கழற்றும்படி சொன்னது. அந்த பெல்ட்டுகளைக் கொண்டு என்னுடன் வந்த சகப்பணியாளரின் கைகளை அவர்கள் கட்டிப்போட்டனர். 

அப்போது உள்ளே நுழைந்த மேலும் 2 பேர் அங்கிருந்த 3 பேருடன் சேர்ந்து கொண்டனர். அவர்களில் 3 பேர் எனது சகப்பணியாளரை அசையவிடாமல் பார்த்துக் கொண்டனர். 2 பேர் மட்டும் என்னை ஒரு சுவற்றின் அருகில் இழுத்துச் சென்றனர். அந்த நேரத்தில் எனது செல்போனில் மணி அடித்தது. 

எதிர்முனையில் பேசிய எனது அம்மா நீ பத்திரமாக இருக்கிறாயா? என்று கேட்டார். அப்போது அங்கிருந்தவர்கள் "எல்லாம் சரியாக இருக்கிறது என்று சொல்" எனக் கூறி என்னை மிரட்டினார்கள். அவர்கள் சொன்னது போலவே என் அம்மாவை நான் சமாதானப்படுத்தினேன். 

சற்று நேரத்திற்கெல்லாம் மீண்டும் ஒருமுறை போன் செய்த அம்மா என்னை நலம் விசாரித்தார். அப்போது அவர்களில் ஒருவன் எனது செல்போனைப் பறித்து ‘சுவிட்ச் ஆப்’ செய்து வைத்து விட்டான். அதன்பிறகு, ஒரு பீர் பாட்டிலை உடைத்து கூரிய முனையை என் கழுத்தருகே நீட்டி அவர்கள் 5 பேரும் மாறிமாறி என்னை கற்பழித்தனர். என பாதிக்கப்பட்ட மும்பை பெண் வாக்குமூலம் அளித்துள்ளார்.

கற்பழிப்பினால் மட்டுமே ஒரு வாழ்க்கை முடிந்து விடுவதில்லை. இந்த கொடூரக் குற்றத்தை செய்தவர்களுக்கு விரைவில் கடுமையான தண்டனை வழங்கப்பட வேண்டும். என்று கூறிய அவர், குணமடைந்த பிறகு மீண்டும் வேலைக்கு செல்ல விரும்புவதாக தெரிவித்தார்.