புதிய கண்டு பிடிப்பு-பெரம்பூர் +1 மாணவியர்

கொசுக்களை ஒழிப்பதற்கான புதிய கருவியை பெரம்பூரில் உள்ள கல்கி அரங்கநாதன் மான்ட்போர்டு மெட்ரிகுலேஷன் மேல்நிலைப் பள்ளி மாணவிகள் கண்டுபிடித்துள்ளனர்.

கொசுக்களை கவர்ந்திழுத்து மின்சாரத்தின் உதவியால் அழிக்கும் இந்த புதிய கருவியை பள்ளியின் ஆசிரியர் எஸ்.அல்போன்ஸ் வழிகாட்டலில் 11-ஆம் வகுப்பு மாணவிகள் ஐ.அபிராமி, டி.ஒபிலியா, வி.தேன்மொழி ஆகியோர் கண்டுபிடித்துள்ளனர். சென்னை பத்திரிகையாளர் மன்றத்தில் இந்தக் கருவியின் செயல்பாடுகள் குறித்து மாணவிகள் சனிக்கிழமை செயல் விளக்கம் அளித்தனர். அப்போது அவர்கள் கூறியதாவது:

மனித உடலில் இருந்து வெளியேறும் வாசனையை, திரவம் மூலம் உருவாக்கி, கொசுக்களை கவர்ந்திழுத்து அழிக்கும் புதிய கருவியை, தனியார் பள்ளி மாணவியர் கண்டுபிடித்துள்ளனர்.

சென்னை, பெரம்பூர், கலிகி ரங்கநாதன் மான்ட்போர்டு மெட்ரிக் பள்ளியில், பிளஸ் 1 படிக்கும் ஒப்பிலியா, தேன்மொழி, அபிராமி ஆகிய மூன்று மாணவியர், மிக மிக குறைந்த செலவில் கொசுவை ஒழிக்கும் கருவியை கண்டுபிடித்து உள்ளனர்.இந்த புதிய கருவியின் செயல்பாடு குறித்து மாநகராட்சி மேயர் சைதை துரைசாமிக்கு, அவர்கள் செயல்முறை விளக்கம் அளித்தனர்.

அப்போது மாணவியர் கூறியதாவது:மனித உடலில் இருந்து வெளியேறும் வெப்பம், கார்பன் டை ஆக்சைடு, வியர்வையில் இருந்து வெளிப்படும் வாசனை மூலம் கொசுக்கள் மனிதர்களை அடையாளம் கண்டுபிடித்து, கடிக்கின்றன. அதன் அடிப்படையில் தான் இந்த கருவி தயாரிக்கப்பட்டுள்ளது.

*செவ்வக வடிவில் பெட்டி போன்று காணப்படும் இந்த கருவியில், இரண்டு பக்கங்களிலும் கம்பி வலைகள் உள்ளன. அந்த வலைகளில் 20 முதல் 40 வாட் வரை மின்சாரம் பாய்ச்சப்படும்.

*பெட்டியின் கீழ்ப்பக்கத்தில் மூன்று திரவங்களை கொண்ட கண்ணாடி குடுவை பொருத்தப்பட்டுள்ளது.

*இரண்டு துளைகள் கொண்ட ரப்பர் அடைப்பான் மூலம் அந்த குடுவை மூடப்பட்டுள்ளது.

*ஒரு துளை வழியாக காற்றை குடுவைக்குள் செலுத்தும் போது, திரவம், கம்பி வலை வழியாக வாயுவாக வெளியேறும்.

*இந்த வாயு, மனித உடலில் வியர்வை வாசனை போன்று இருக்கும். அந்த வாசனையால், கவரப்படும் கொசுக்கள், கம்பி வலையை நோக்கி ஈர்க்கப்படும். மின்சாரம் தாக்கி அழியும்.

இந்த கருவியை தயாரிக்க, 1,750 ரூபாய் செலவாகும். திரவ கலவை 50 மி.லி., அளவு, 30 ரூபாய் ஆகும். இந்த கலவை இரண்டு மாதங்களுக்கு பயன்படும்.கருவிக்கு ஐந்து ஆண்டுகள் வரை உத்தரவாதம் தரலாம்.

கருவியில் இரவு நேர மின்விளக்கும் பொருத்திக் கொள்ளலாம்.தற்போது கடைகளில் விற்கப்படும் கொசு ஒழிப்பு மருந்துகள் மனிதர்களுக்கு நுரையீரல் பாதிப்பு உட்பட, பல்வேறு பிரச்னைகளை ஏற்படுத்தும். இந்த திரவ கலவை அதுபோன்ற பாதிப்பை ஏற்படுத்தாது. அதற்கு உரிய சான்றிதழ் பெறப்பட்டுள்ளது.இவ்வாறு மாணவியர் விளக்கம் அளித்தனர்.

கருவியின் செயல்பாடுகளை கேட்டறிந்த மேயர் சைதை துரைசாமி, கருவி தயாரிப்பு செலவை குறைக்க மாணவியருக்கு அறிவுரை வழங்கினார்.

இதுகுறித்து மாணவியர் கூறுகையில், ‘தற்போது இந்த கருவி, பிளைவுட் மூலம் செய்யப்பட்டுள்ளது. பிளாஸ்டிக்கில் செய்யப்பட்டால் செலவு இன்னும் குறையும்’ என்றனர்.

ஆட்டோ - புதிய கட்டண அட்டை அமல்

புதிய கட்டண அட்டையை அமல் படுத்தாத ஆட்டோ உரிமையாளர்கள் மீது கடுமையான நடவடிக்கை எடுக்கப்படும் என்று போக்குவரத்து அதிகாரிகள் முடிவெடுத்துள்ளனர்.

ஆட்டோ கட்டணத்தை மாற்றியமைத்து கடந்த ஆகஸ்டு 25-ந் தேதி முதல்-அமைச்சர் ஜெயலலிதா உத்தரவிட்டார். இதையடுத்து, திருத்திய கட்டணம் உள்பட பல்வேறு விவரங்களை கொண்ட அட்டை அந்தந்த வட்டார போக்குவரத்து அலுவலகங்களில் வழங்கப்பட்டது.

இந்த அட்டையை ஆட்டோவில் பயணம் செய்பவர்களுக்கு தெரியும் விதமாக ஓட்டுனர் இருக்கைக்கு பின்புறம் ஒட்டி வைக்கவேண்டும். இந்த நடைமுறை இன்று செப்டம்பர் 16 திங்கட்கிழமை முதல் அமலுக்கு வந்துள்ளது. இதனால், புதிய கட்டண அட்டை வழங்கும் பணி, வட்டார போக்குவரத்து அலுவலகங்களில் நேற்று இரவு வரை நடந்தது.

சென்னையிலுள்ள 72 ஆயிரம் ஆட்டோக்களில், இதுவரை 52 ஆயிரம் ஆட்டோ உரிமையாளர்கள் மட்டுமே இந்த அட்டையை பெற்றுள்ளனர். எனவே மீதமுள்ள 20 ஆயிரம் ஆட்டோ உரிமையாளர்கள் மீது செப்டம்பர் 16 முதல் நடவடிக்கை எடுக்க ஆரம்பித்துள்ளார்கள். இதற்காக போக்குவரத்து அதிகாரிகள் 40 பேர் தனித்தனி குழுக்களாக இன்று சென்னை முழுவதும் தீவிர கண்காணிப்பில் ஈடுபட உள்ளனர்.

இதற்கிடையில் திருத்திய புதிய கட்டண மீட்டர்களை அக்டோபர் 15-ந் தேதிக்குள் ஆட்டோக்களில் பொருத்த வேண்டும் என்று தமிழக அரசு கால நிர்ணயம் செய்துள்ளது. இதனால், தங்கள் ஆட்டோக்களில் உள்ள பழைய மீட்டர்களில், புதிய கட்டணத்தை பதிவு செய்யும் பணியில் டிரைவர்கள் ஈடுபட்டுள்ளனர்.

சென்னை புதுப்பேட்டை, சிந்தாதிரிப்பேட்டை உள்பட பல இடங்களில் மீட்டர் பழுதுபார்க்கும் கடைகளில் ஆட்டோ டிரைவர்களின் கூட்டம் அலைமோதுகிறது. எனினும் ஆட்டோ மீட்டரில் புதிய கட்டணத்தை மாற்றி அமைக்கும் பணிக்கான காலஅவகாசத்தை தமிழக அரசு நீட்டிக்க வேண்டும் என்று ஆட்டோ டிரைவர்கள் கோரிக்கை விடுத்துள்ளனர்.

மலிவு விலையில் பாதுகாப்பான குடிநீர்

நாளை முதல் அனைத்து பேருந்து நிலையங்கள் மற்றும் அரசுப் பேருந்துகளிலும் மலிவு விலையில் பாதுகாப்பான குடிநீரை வழங்கும் திட்டத்தைத் தொடங்கி வைக்கிறார் முதல்வர் ஜெயலலிதா.

அத்தியாவசியப் பொருள்களின் விலை அநியாயத்துக்கு உயர்ந்து வருவதால், அவற்றை மலிவு விலையில் அரசு சார்பில் மக்களுக்கு வழங்கும் திட்டங்களை முதல்வர் ஜெயலலிதா அறிவித்து நடைமுறைப்படுத்தி வருகிறார்.

ஏழை எளிய மக்கள் பயன்பெறுவதற்காக விலையில்லா அரிசி, நியாய விலை கடைகளில் குறைந்த விலையில் பாமாயில், துவரம் பருப்பு, உளுத்தம் பருப்பு ஆகியவை வழங்கப்படுகிறது. சென்னை மற்றும் புறநகர் பகுதியில் மலிவு விலை காய்கறி கடைகள் அமைக்கப்பட்டுள்ளன.

ஏழைகளும், கூலித் தொழிலாளர்களும் பயன்பெறும் வகையில் அனைத்து மாநகராட்சிகளிலும் அம்மா உணவகங்கள் திறக்கப்பட்டுள்ளன. இங்கு இட்லி, பொங்கல், தயிர் சாதம், சப்பாத்தி உள்பட பல்வேறு உணவு வகைகள் மிகவும் குறைந்த விலைக்கு வழங்கப்படுகின்றன.

இதுபோன்று ஏழை, எளிய மற்றும் பொது மக்களின் நலன் கருதி அரசு போக்குவரத்து கழகங்கள் சார்பில் தமிழகம் முழுவதும் ‘அம்மா குடிநீர்’ உற்பத்தி நிலையங்களை அமைக்க முதல்வர் ஜெயலலிதா உத்தரவிட்டு உள்ளார்.

குறைந்த விலையில் பாதுகாப்பான குடிநீர் வழங்கும் திட்டத்தின் முதல் கட்டமாக திருவள்ளூர் மாவட்டம் கும்மிடிப்பூண்டியில் நாள் ஒன்றுக்கு 3 லட்சம் லிட்டர் மினரல் வாட்டர் தயாரிக்கும் குடிநீர் உற்பத்தி நிலையம் அமைக்கப்பட்டது. இங்கு தயாரிக்கப்படும் சுத்திகரிக்கப்பட்ட சுத்தமான குடிநீர் ‘அம்மா குடிநீர்’ என்ற பெயரில் விற்பனை செய்யப்படுகிறது.

இந்த நிலையத்தில் இருந்து உற்பத்தி செய்யப்படும் சுத்திகரிக்கப்பட்ட குடிநீர் 1 லிட்டர் பிளாஸ்டிக் பாட்டில்களில் நிரப்பப்பட்டு நீண்டதூரம் செல்லும் அரசு பேருந்துகளில் விற்பனை செய்யப்படும். சென்னையில் உள்ள பேருந்து நிலையங்கள், மாவட்டங்களில் உள்ள பேருந்து நிலையங்கள் ஆகியவற்றிலும் இந்த குடிநீர் விற்பனைக்குக் கிடைக்கும்.

ரெயில்வே நிர்வாகம் 1 லிட்டர் குடிநீர் பாட்டில்களை ரூ.15-க்கும், தனியார் நிறுவனங்கள் ரூ.20-க்கும் விற்பனை செய்கின்றன. ஆனால் ‘அம்மா குடிநீர்’ 1 லிட்டர் பாட்டில் 10 ரூபாய்க்கே விற்பனை செய்யப்பட உள்ளது.

முதல்வர் ஜெயலலிதா ஏற்கனவே அறிவித்தப்படி ‘அம்மா குடிநீர்’ விற்பனை அண்ணா பிறந்த நாளான நாளை (ஞாயிற்றுக்கிழமை) தொடங்குகிறது. இதன் தொடக்க விழா காலை 11.15 மணிக்கு சென்னை தலைமை செயலகத்தில் நடைபெறுகிறது.

திருவள்ளூர் மாவட்டம் கும்மிடிப்பூண்டி சாலை போக்குவரத்து நிறுவன வளாகத்தில் அமைக்கப்பட்டுள்ள ‘அம்மா குடிநீர்’ உற்பத்தி நிலையத்தை முதல்வர் ஜெயலலிதா காணொலி காட்சி மூலம் திறந்து வைக்கிறார்.

நிகழ்ச்சியில் போக்குவரத்து துறை அமைச்சர் செந்தில் பாலாஜி, தலைமை செயலாளர் ஷீலாபால கிருஷ்ணன், போக்குவரத்து துறை முதன்மை செயலாளர் பிரஜ்கிஷோர் பிரகாஷ் ஆகியோர் கலந்து கொள்கிறார்கள்.

பள்ளியில் மாணவ - மாணவியர் செல்போனுக்கு தடை

பள்ளிகளுக்கு மாணவ- மாணவிகள் செல்போன் கொண்டு செல்ல தமிழக கல்வித்துறை அதிரடியாக தடை விதித்துள்ளது.
தமிழகத்தில் உள்ள பள்ளிகளில் தற்போது மாணவ- மாணவிகள் அதிக அளவு செல்போன்களை பயன்படுத்த தொடங்கிவிட்டனர்.

பள்ளிகளுக்கு மாணவர்கள் செல்போன் கொண்டு செல்லக் கூடாது என்று ஏற்கனவே பள்ளிக்கல்வித்துறை சுற்றறிக்கை விடுத்திருந்தும் செல்போன்களை மாணவர்கள் கொண்டுதான் செல்கிறார்கள்.
செல்போன்கள் மூலம் மாணவர்கள் ஆபாச படங்கள் பார்ப்பதாகவும் அதிர்ச்சியளிக்கும் தகவல்கள் வெளியாகிவருகின்றன.

இதனால், அவர்களின் கவனம் வேறுவிதமாக சென்று வாழ்க்கையை வீணாகும் அளவுக்கு போய்விடுகிறது.
வகுப்பு நடந்து கொண்டிருக்கும்போதே மாணவர்கள், எஸ்.எம்.எஸ் அனுப்புகின்றனர். இதனால் பாடத்தில் கவனம் சிதறுவதோடு, தேர்வில் தோல்வி அடைகிறார்கள். இளம் வயது காதல் உருவாவதும் செல்போன்களால்தான். எனவே இதனை தடை செய்ய பள்ளிக் கல்வித்துறை அதிரடி நடவடிக்கை எடுத்துள்ளது.

இது குறித்து பள்ளிக்கல்வித்துறை அதிகாரி ஒருவர் கூறுகையில், ” பள்ளிக்கூடங்களுக்கு மாணவர்கள் செல்போன் கொண்டு வரக்கூடாது என்று ஏற்கனவே தடை விதித்து பள்ளிக்கல்வி இயக்குனரகத்தில் இருந்து முதன்மை கல்வி அதிகாரிகள் வழியாக பள்ளிகள் அனைத்துக்கும் சுற்றறிக்கை விடப்பட்டுள்ளது.

இருப்பினும் மாணவர்கள் பள்ளிக்கூடங்களுக்கு செல்போன் கொண்டு வருவதாக புகார் வந்தால் மீண்டும் தமிழ்நாடு முழுவதும் அனைத்து பள்ளிகளிலும் எந்த ஒரு மாணவ, மாணவியும் செல்போன் கொண்டு வரக்கூடாது.

அவ்வாறு மீறி கொண்டு வருவது கண்டுபிடிக்கப்பட்டால் செல்போனை ஆசிரியர் வாங்கி வைத்துக் கொண்டு எச்சரித்து வகுப்பு முடிந்ததும் வீட்டுக்கு செல்லும்போது வழங்குவார். இந்த சுற்றறிக்கையை அனைத்து பள்ளிகளுக்கும் அனுப்ப உத்தரவிடப்பட்டுள்ளது” என்று கூறியுள்ளார்.

மழை நீடிக்குமா?

சென்னை உள்பட 23 மாவட்டங்களில் இன்னும் 2 நாட்களுக்கு கன மழை பெய்யும் என்று வானிலை ஆய்வு மையம் அறிவித்துள்ளது. இதனால் பள்ளி, கல்லூரிகளுக்கு விடுமுறை அறிவிக்கப்பட்டுள்ளது.

தமிழகத்தில் கடந்த 2 நாள் பெய்த மழைக்கு 6 பேர் உயிரிழந்துள்ளனர். மத்திய மேற்கு வங்க கடலில் வளிமண்டல மேல் அடுக்கில் ஏற்பட்டுள்ள காற்றழுத்த தாழ்வு நிலை காரணமாக கடந்த சில நாட்களாக தமிழகத்தின் பல பகுதிகளில் பலத்த மழை பெய்து வருகிறது.

சென்னை, திருவள்ளூர், காஞ்சிபுரம் உள்ளிட்ட வட மாவட்டங்களில் நேற்று முன்தினம் மாலை தொடங்கிய மழை இன்று பிற்பகல் வரை நீடித்தது. அவ்வப்போது பலமாகவும் தூறலுமாக விட்டுவிட்டு மழை பெய்து வருவதால் மக்களின் இயல்பு வாழ்க்கை பாதித்துள்ளது. சென்னை மற்றும் புறநகர் பகுதிகளில் இரவில் பலத்த மழை பெய்கிறது. இதனால் கூவம், பக்கிங்காம், அடையாறு ஆற்றங்கரையோர பகுதிகளில் வெள்ள நீர் புகுந்து மக்கள் அவதிக்குள்ளாகினர்.

 சாலையோரங்களில் கழிவுநீர், மழை நீர் வடிகால் பணிகளுக்காக தோண்டப்பட்ட பள்ளங்களில் மழைநீர் நிறைந்துள்ளது. வாகன ஓட்டிகளும் நடந்து செல்பவர்களும் இந்த பள்ளத்தில் விழுந்து காயமடைகின்றனர். அடையாறு, வேளச்சேரி, ரேடியல் சாலை, திருவொற்றியூர், மணலி, தங்கசாலை, எண்ணூர், பாரிமுனை, பெரம்பூர், மாதவரம் போன்ற பகுதிகளில் மழையால் கடும் போக்குவரத்து நெரிசல் ஏற்பட்டது. வாகனங்கள் நீண்டதூரம் அணிவகுத்து நின்றன. சாக்கடைகளில் அடைப்பு ஏற்பட்டுள்ளதால் மழை நீருடன் கழிவு நீர் கலந்து தேங்கி நிற்கிறது. இதனால் நகரில் சுகாதார சீர்கேடு ஏற்பட்டுள்ளது.

மழை வெள்ள பாதிப்புகள் குறித்து முதல்வர் ஜெயலலிதா தலைமையில் நேற்று ஆலோசனை கூட்டம் நடத்தப்பட்டது. போர்க்கால நடவடிக்கைகள் எடுக்க அதிகாரிகளுக்கு முதல்வர் உத்தரவிட்டுள்ளார். மேயர் சைதை துரைசாமி மற்றும் அதிகாரிகள் குழுவினர், மழையால் பாதிக்கப்பட்ட இடங்களை பார்வையிட்டு வெள்ள நீரை வடிய வைப்பதற்கான நடவடிக்கைகளில் ஈடுபட்டு வருகின்றனர்.

தொடர் மழையால் கூலித் தொழிலாளர்கள், சிறு வியாபாரிகள் கடுமையாக பாதிக்கப்பட்டுள்ளனர். மெட்ரோ ரயில் திட்ட பணிகளும் முடங்கியுள்ளது. கட்டுமான பணிகள் நடக்கவில்லை. மழை காரணமாக சென்னை, திருவள்ளூர், காஞ்சிபுரம் மாவட்டங்களில் பள்ளி, கல்லூரிகளுக்கு இன்று விடுமுறை விடப்பட்டது. மக்கள் வீடுகளிலேயே முடங்கிக் கிடக்கின்றனர்.
கோயம்பேடு மார்க்கெட்டுக்கு காய்கறி வரத்தும் குறைந்து விட்டது. இதனால் காய்கறிகளின் விலை உயரத் தொடங்கியுள்ளது. இன்னும் 2 நாட்களுக்கு மழை நீடிக்கும் என்று சென்னை வானிலை ஆய்வு மையம் தெரிவித்துள்ளது.

இதுகுறித்து சென்னை வானிலை ஆய்வு மைய இயக்குனர் ரமணன் கூறியதாவது:
"கடந்த சில நாட்களாக வட தமிழகம், புதுச்சேரி, கேரளா, ஆந்திரா, கர்நாடகா, லட்சத்தீவு ஆகிய பகுதிகளில் பலத்த மழை பெய்து வருகிறது. அடுத்த 48 மணி நேரத்துக்கு மேற்கண்ட இடங்களில் பலத்த மழை பெய்யும். தமிழகத்தில் சென்னை, காஞ்சிபுரம், திருவள்ளூர், கடலூர், விழுப்புரம், தஞ்சை, திருவாரூர், நாகை, புதுக்கோட்டை, வேலூர், திருவண்ணாமலை, கிருஷ்ணகிரி, தர்மபுரி, சேலம், நாமக்கல், நீலகிரி, திருப்பூர், கோவை, ஈரோடு, கரூர், திருச்சி, அரியலூர், பெரம்பலூர் ஆகிய மாவட்டங்களிலும் புதுச்சேரியிலும் பலத்த மழை பெய்யும். புயல் குறித்து எச்சரிக்கை ஏதும் இல்லை என்றாலும் பலத்த காற்று வீசக் கூடும்." இவ்வாறு அவர் கூறினார்.

தமிழகம் முழுக்க மழைக்கு இதுவரை 6 பேர் பலியாகியுள்ளனர். சென்னை அம்பத்தூரில் ஓகுதாஸ் என்பவரும், பெரம்பூரில் பெருமாள் என்பவரும் மின்சாரம் தாக்கி பலியாயினர். திருத்தணியில் குமாரசாமி வீடு இடிந்து விழுந்து இறந்தார். தஞ்சையில் 2 பேரும் திருச்சியில் ஒருவரும் மழைக்கு பலியாகியுள்ளனர்.

தமிழகத்தில் நேற்று அதிகபட்சமாக சென்னையில் 12 செ.மீ. மழை பெய்துள்ளது. டிஜிபி அலுவலகத்தில் அமைக்கப்பட்டுள்ள மழை மானியில் சென்னையில் 12 செ.மீ. மழை பெய்ததாக பதிவானது. திருவள்ளூர் மாவட்டம் ஆர்.கே.பேட்டை, திருத்தணி, சோளிங்கர், காஞ்சிபுரம் மாவட்டம் கேளம்பாக்கம், ஸ்ரீபெரும்புதூர் ஆகிய இடங்களில் 11 செ.மீ., பள்ளிப்பட்டில் 10, அரக்கோணம், தாம்பரம், செம்பரம்பாக்கம், வட சென்னையில் 9,  திருவாலங்காடு, கலவையில் 8, பூந்தமல்லி, பூண்டி, காவேரிப்பாக்கம் பகுதிகளில் 7, ஆரணி, காஞ்சிபுரத்தில் 6, வாலாஜா, சோழவரம் பகுதிகளில் 5 செ.மீ. மழை பதிவாகியிருக்கிறது.

கச்சத்தீவு

இராமநாதபுரம் அரண்மனை நகரில் அமைந்துள்ளது. இது 17 ஆம் நூற்றாண்டில் கட்டப்பட்டதாகும். கிழவன் சேதுபதி என்னும் மன்னரால் கட்டப்பட்ட இந்த அரண்மனைக்குள் இராமலிங்க விலாசம் என்னும் அரசவை மண்டபமும் கெளரி விலாசம் என்னும் விருந்தினர் மாளிகையும் இராசராசேசுவரி கோவிலும் வேறு சில மாளிகைகளும் இருக்கின்றன.

கடந்த 133 ஆண்டுகளுக்கு முன்பு ராமநாதபுரம் சேதுபதி மன்னர்கள் கச்சத்தீவை குத்தகைக்கு விட்ட ஆவணங்களை, ராமநாதபுரம் மன்னரின் வாரிசு தமிழக அரசுக்கு அனுப்பியுள்ளார்.

ராமேசுவரத்தில் இருந்து 10 கி.மீ தூரத்தில் வடகிழக்கு பகுதியில் அமைந்துள்ளது, சின்னஞ்சிறிய கச்சத்தீவு. இந்தியாவிடம் இருந்து பெற்ற இந்த தீவுப்பகுதியில் இந்திய மீனவர்களையே மீன்பிடிக்க விடாமல் இலங்கை அடாவடி செய்து வருவதால், கச்சத்தீவு பிரச்னை இப்பொழுது பெரும் பிரச்னையாக உருவெடுத்துள்ளது.

இந்த தீவு நீண்ட நெடுங்காலமாக ராமநாதபுரம் சமஸ்தான மன்னர்களுக்கு பூர்வீக பாத்தியமாக இருந்து வந்துள்ளது. இந்த தீவு பகுதி கடல்வளம் நிறைந்த பகுதியாகும். இந்த கடல் பகுதியைச் சுற்றிலும் அபூர்வ சங்குகள் கிடைக்கின்றன. கச்சத்தீவு தரைப்பரப்பில் சாய வேர்கள், மருந்து செடிகள் கிடைக்கின்றன. அதோடு எண்ணெய் வளம் நிறைந்த பகுதியாகவும் இது உள்ளது.

இந்த கடல் பகுதியை பயன்படுத்திக்கொள்ள ராமநாதபுரத்தை ஆண்ட மன்னர்கள் 25.7.1880 அன்று ராமநாதபுரம் பகுதியைச் சேர்ந்த முத்துச்சாமி பிள்ளை, அப்துல்காதர் மரைக்காயர் ஆகியோருக்கு ரூ.700க்கு 5 வருட குத்தகைக்கு விட்டுள்ளனர்.

இதுதவிர 1914ஆம் ஆண்டு முதல் 1941ஆம் ஆண்டு வரை பாம்பனைச் சேர்ந்த முகமது மீரா சாபு மரைக்காயருக்கு ராமநாதபுர சமஸ்தான திவான் சுப்பையா நாயுடு 15 வருட குத்தகைக்கு விட்டுள்ளார்.இந்த குத்தகை ஒப்பந்த ஆவண நகல்களை, ராமநாதபுரம் மன்னர் சண்முகராஜேசுவர சேதுபதியின் மகன் வழி பேரன் குமரன் சேதுபதி, “மேற்படி கச்சத்தீவு ராமநாதபுரம் சமஸ்தானத்துக்கு சொந்தமானது” என்பதை உறுதிப்படுத்தும் வகையில் தமிழக அரசுக்கு அனுப்பி வைத்துள்ளது.

இட்லி, சாம்பார் சத்துள்ள உணவு - ஆய்வு முடிவு

தமிழகத்தின் பாரம்பரிய உணவான இட்லி, சாம்பார் தான் அதிக சத்துக்கள் நிறைந்த காலை உணவு என ஆய்வில் கண்டறியப்பட்டுள்ளது. மற்ற பெரு நகரங்களில் சாப்பிடப்படும் காலை உணவுடன் ஒப்பிடுகையில் சென்னையின் இட்லி, சாம்பார் தான் அதிக சத்துக்கள் நிறைந்தது என ஆய்வாளர்கள் தெரிவித்துள்ளனர்.

இந்திய காலைநேர உணவு பழக்கம் குறித்து மும்பை, டில்லி, கோல்கட்டா, சென்னை ஆகிய 4 பெருநகரங்களில் ஆய்வு நடத்தப்பட்டது. 8 முதல் 40 வயது வரையிலான சுமார் 3600 பேரிடம் இந்த ஆய்வு நடத்தப்பட்டு, அவர்களின் உடலில் நிறைந்துள்ள சத்துக்களின் அளவு குறித்து ஆய்வு மேற்கொள்ளப்பட்டுள்ளது. கார்போஹைட்ரோட், ஆற்றல், புரோட்டீன், கொழுப்புக்கள், கால்சியம் ஆகியவற்றை அடிப்படையாகக் கொண்டு இந்த ஆய்வு நடத்தப்பட்டது.

சமீப காலமாக இந்தியாவில் மக்களிடையே ஆரோக்கியம் குறித்த கவனம் அதிகரித்து வருகிறது; இந்த ஆய்வு மக்களின் உணவு பழக்கத்தை பிரதிபலிப்பதற்காக அல்ல; உணவில் குறிப்பாக காலை உணவில் நாம் சாப்பிடும் முறை மற்றும் வாழ்க்கைமுறையில் மாற்றம் ஏற்படுத்துவதற்கானதாகும்; உணவு தொடர்பாக நடத்தப்பட்ட ஏராளமான ஆய்வில் அதிகப்படியாக மக்கள் காலை உணவை தவிர்ப்பதும், உணவு சாப்பிட்டாலும் குறைந்த அளவு சத்துக்கள் கொண்டதாகவும் இருப்பது தெரிய வந்துள்ளது; தற்போது நடத்தப்பட்ட ஆய்வில் கோல்கட்டாவின் பாரம்பரிய காலை உணவில் மைதா அதிக சேர்க்கப்படுகிறது; இதில் கார்போஹைட்ரேட்கள் அதிகம்; மிகக் குறைந்த அளவே புரோட்டீன் சேர்க்கப்படுகிறது; நார்சத்து கிடையாது; டில்லி உணவில் எண்ணெய் மிகவும் அதிகம்; மும்பையில் முறையற்ற உணவு சாப்பிடப்படுகிறது; இங்குள்ளவர்கள் வெறும் கார்போஹைட்ரேட்கள் நிறைந்த ரொட்டிகளை சாப்பிடுகிறார்கள். இவ்வாறு மும்பை நிர்மலா நிகேதன் அறிவியல் கல்லூரியின் ஆராய்ச்சித்துறை இயக்குனர் மாலதி சிவராமகிருஷ்ணன் தெரிவித்துள்ளார்.

மும்பையில் 79 சதவீதம் மக்கள் போதிய சத்துக்கள் அற்ற உணவுகளை சாப்பிடுகின்றனர். டில்லியில் 76 சதவீதம் பேரும், கோல்கட்டாவில் 75 சதவீதம் பேரும் சத்துக்கள் இல்லாத உணவை சாப்பிடுகிறார்கள். சென்னையில் 60 சதவீதம் பேர் மட்டுமே போதிய சத்துக்கள் இல்லாத உணவை சாப்பிடுகிறார்களாம்.

மற்றவர்களை விட தென்னிந்திய கிராமப்புறங்களில் வாசிப்பவர்களின் உணவில் சத்துக்கள் அதிகமாக உள்ளது. அவர்கள் ராகியை அதிகம் பயன்படுத்துவதால் அதில் வைட்டமின் பி, நார்சத்து, புரோட்டீன், கால்சியம், இரும்புச் சத்து, பாஸ்பரஸ் ஆகிய சத்துக்கள் இருப்பதாக மெட்ராஸ் மருத்துவ கல்லூரியின் உணவு கட்டுப்பாட்டு நிபுணர் மீனாட்சி பஜாஜ் தெரிவித்துள்ளார். பிரபலமான இட்லி, சாம்பார் தான் அனைத்து சத்துக்களையும் உள்ளடக்கிய முழுமையான உணவு எனவும் மீனாட்சி தெரிவித்துள்ளார்.

இட்லியில் உள்ள அரிசி மற்றும் உளுந்தம் பருப்பு உணவில் முழுமையான சத்துக்களை அளிப்பதாக ஆய்வில் தெரிவிக்கப்பட்டுள்ளது. சாம்பாரில் உள்ள காய்கறிகள் மற்றும் பருப்பு சரிவிகித அளவில் சேர்க்கப்படுவதால் சத்துக்கள் அதிகம் கொண்டதாக உள்ளது. இந்தியாவில் நான்கில் ஒரு பங்கு மக்கள் காலை உணவை தவிர்கின்றனர். ஆனால் சென்னையில் காலை உணவை தவிர்ப்பவர்கள் மிகவும் குறைவு. சத்துக்கள் குறைவான உணவை சாப்பிடுபவர்களும் சென்னையில் குறைவு. சென்னையில் 50 சதவீதம் குடும்ப பெண்களும், 30 சதவீதம் வயதானவர்களும், 20 சதவீதம் வேலைக்கு செல்பவர்களும் காலை உணவாக ஆற்றல் தரும் பானங்களை மட்டுமே உட்கொள்கின்றனர்.

பிஸ்ஸா,பர்கர்,மக்காச்சோளத்தில் இருந்து தயாராகும் உணவுகள் அமெரிக்காவுக்கும்,ஐரோப்பியர்களுக்கும் பொருந்தும்;நமக்கு சிறிதும் பொருந்தாது.எனவே,பிஸ்ஸா,பர்கர்,கலர் கலராக டிவி விளம்பரங்களில் வரும் பன்னாட்டு குளிர்பானங்கள் நமது உடல்நலத்தைக் கெடுக்கக் கூடியவை;இவை நமது பண்பாட்டுக்கு எதிராகச் செயல்படும் மேல்நாட்டின் நோயை உருவாக்கும் ஐந்தாம் படைகள்;இவைகளை நாம் அவசியம் தவிர்க்க வேண்டும்.

தீ குண்டத்தில் விழுந்த 7 பெண்கள்

வேப்பங்குப்பம் அருகே வெள்ளிக்கிழமை நடந்த தீமிதி திருவிழாவில் தீமிதிக்க முந்தி செல்ல முயன்றபோது தீ குண்டத்தில் விழுந்த 7 பெண்கள் காயமடைந்துள்ளனர்.

வேப்பங்குப்பம் அருகே கீழ்கொத்தூர் கொல்லைமேடு முத்துமாரியம்மன் கோயில் தீமிதி திருவிழா இன்று மாலை நடந்தது.  கூட்ட நெரிசல் காரணமாக ஒருவரை ஒருவர் முந்தி சென்று தீமிதிக்க முயன்றபோது தவறி தீ குண்டத்தில் பெண்கள் விழுந்தனர்.  அதில் கீழ்கொத்தூர் கிராமத்தை சேர்ந்த வள்ளியம்மாள் (50), லட்சுமி (25), தனலட்சுமி (25), ரேகா (22), செல்வி (40), கன்னிகாபுரம் கிராமத்தை சேர்ந்த பாப்பம்மாள் (55), தொரப்பாடி பகுதியை சேர்ந்த திலகவதி (35) ஆகிய 7 பெண்களுக்கு தீக்காயம் ஏற்பட்டது.  தீ குண்டத்தில் விழுந்தவர்களை அங்கிருந்த பொதுமக்கள் மீட்டு சிகிச்சைக்காக வேலூர் அடுக்கம்பாறை அரசு மருத்துவமனையில் சேர்த்தனர்.  இதுகுறித்து வேப்பங்குப்பம் போலீஸார் விசாரணை நடத்தினர்.